27 სექტემბერი სოხუმის დაცემის დღეა. ქუთაისის მერმა იოსებ ხახალეიშვილმა, სახელმწიფო რწმუნებულმა იმერეთში ზვიად შალამბერიძემ და ადგილობრივი ხელისუფლების წარმომადგენლებმა გვირგვინით შეამკეს აფხაზეთის ომის გმირების მემორიალი. სასულიერო პირებმა ომში დაღუპულთა სულების მოსახსენებელი პანაშვიდი გადაიხადეს.
„27 სექტემბერი ერთ-ერთი ყველაზე ტრაგიკული დღეა საქართველოს ისტორიაში. 1992-1993 წლების ომმა უამრავი ჩვენი თანამემამულის სიცოცხლე შეიწირა, ასეულ ათასობით ადამიანი აიძულა სახლ-კარი მიეტოვებინა და საკუთარ სამშობლოში დევნილად ქცეულიყო. თითქმის სამი ათეულია წელია, არ ყოფილა არცერთი დღე, რომ არ გვახსოვდეს აფხაზეთი. ეს არ არის მხოლოდ ქართველების ტკივილი, ეს აფხაზების დარდიცაა და ჩვენ უნდა დავიბრუნოთ ერთმანეთი! მხოლოდ მშვიდობიანი გზით და ურთიერთგაგებით შევძლებთ ამ მიზნის მიღწევას. ოკუპაცია აუცილებლად დასრულდება და საქართველო კვლავ ერთიანი და ძლიერი სახელმწიფო იქნება!” - განაცხადა იოსებ ხახალეიშვილმა.
,,მე დავიბადე და გავიზარდე ქალაქ სოხუმში და ჩემთვის დღევანდელი დღე ორმაგად მტკივნეულია. თუმცა ჩვენი ევროპული მომავალი წარმოუდგენელია აფხაზეთის და აფხაზების გარეშე. ჩვენ ვართ ერთნი და ჩვენ ერთმანეთს აუცილებლად დავიბრუნებთ. დღევანდელი დღე უნდა იქცეს შერიგების დღედ და თითოეულმა ჩვენგანმა ამისთვის ყველაფერი უნდა გავაკეთოთ“, - განაცხადა სახელმწიფო რწმუნებულმა იმერეთში ზვიად შალამბერიძემ. სოხუმის დაცემის დღის გამო და აფხაზეთის ომში დაღუპულთა ხსოვნის პატივსაცემად, ყველა ადმინისტრაციულ შენობაზე სახელმწიფო დროშები დაშვებულია.