აჭარის უმაღლესი საბჭოს რიგგარეშე პლენარულ სხდომაზე, ავტონომიური რესპუბლიკის უმაღლესი საარჩევნო კომისიის (უსკო) წევრის სამ ვაკანტურ თანამდებობაზე წარმოდგენილი 6 კანდიდატიდან, 5 წლის ვადით, 13-13 ხმით ზაალ ზაალიშვილი, თამარ ქამადაძე და ციალა შავაძე ფარული კენჭისყრით აირჩიეს.

აჭარის უმაღლესი საბჭოს ინფორმაციით, აჭარის მთავრობის თავმჯდომარემ უმაღლეს საბჭოს, უსკო-ს სამ ვაკანტურ თანამდებობაზე 6 კანდიდატურა, 2022 წლის 8 სექტემბერს წარუდგინა - ზაალ ზაალიშვილის, სოფიო კახაძის, დავით ფარტენაძის, თამარ ქამადაძის, ციალა შავაძის, სოფიო შაქარიშვილის კანდიდატურების კანონმდებლობასთან შესაბამისობის საკითხი, კანონით დადგენილ ვადებში, აჭარის უმაღლესი საბჭოს საკონსტიტუციო, იურიდიულ და საპროცედურო საკითხთა კომიტეტმა შეისწავლა, მოისმინა თითოეული კანდიდატის სამოქმედო გეგმა და სამომავლო ხედვები, რის შემდეგაც საკითხი ბიურომ უმაღლესი საბჭოს რიგგარეშე პლენარულ სხდომის დღის წესრიგში შეიტანა.

რიგგარეშე პლენარულ სხდომაზე არჩეული უსკო-ს ახალი წევრების უფლებამოსილება ძალაშია 2022 წლის 27 სექტემბრიდან.