სოხუმის დაცემის 29 წლისთავთან დაკავშირებით, გორის ვიცე-მერმა, ნიკა ღვინიაშვილმა, შიდა ქართლის სახელმწიფო რწმუნებულმა, მიხეილ შაყულაშვილმა და გორის მუნიციპალიტეტის საკრებულოს თავმჯდომარის მოადგილემ, მარლენ ნადირაძემ საქართველოს ტერიტორიული მთლიანობისთვის დაღუპულთა მემორიალი გვირგვინებით შეამკეს. ინფორმაციას ამის შესახებ გორის მუნიციპალიტეტის მერია ავრცელებს.
მათივე ცნობით, მემორიალის მიმდებარე სკვერში ხელისუფლების წარმომადგენლებთან ერთად ვეტერანებიც შეიკრიბნენ. მათ ქვეყნის ტერიტორიული მთლიანობისთვის დაღუპული გმირები კიდევ ერთხელ გაიხსენეს და გარდაცვლილთა ხსოვნას წუთიერი დუმილით პატივი მიაგეს.
სოხუმის დაცემის 29 წლისთავთან დაკავშირებით და აფხაზეთის ომში დაღუპულთა ხსოვნის პატივის მიგების მიზნით, ადმინისტრაციის შენობაზე სახელმწიფო დროშა დაეშვა.
აფხაზეთში სამხედრო დაპირისპირება 1992 წლის 14 აგვისტოს დაიწყო. ომი 13 თვეს და 13 დღეს გაგრძელდა.