დღეს, რასაც ხელისუფლება აკეთებს, ეს კლასიკური გაგებით, რუსეთის წისქვილზე წყლის დასხმაა და პირდაპირ გეტყვით, ამას არავინ აპატიებს - უკრაინელები ივანიშვილს და მის გარემოცვას ამ კონფლიქტის შედეგად ხელის მოთბობას არ აპატიებენ, იმიტომ რომ ამაში ძალიან დიდ ფულს შოულობენ, - ამის შესახებ ყოფილმა დეპუტატმა, ლევან გოგიჩაიშვილმა „პალიტრანიუსის“ გადაცემა „ნიუსრუმში“ განაცხადა.

მისივე თქმით, „ქართული ოცნების“ დამფუძნებელი ბიძინა ივანიშვილი დიდი ხანია პოლიტიკაში ფულს არ ხარჯავს და ე.წ.შავი ბუღალტერია სხვა ადამიანებისგან კეთდება.

„ივანიშვილი ამ პოლიტიკაში დიდი ხანია თავის ფულს აღარ ხარჯავს. ამ ფულს სხვა ადამიანები ხარჯავენ. ეს სალარო, შავი ბუღალტერია სხვა ადამიანებისგან კეთდება. მერე უბრალოდ, ამას პარტია ანაწილებს. პარტია ფულს ანაწილებს არა მარტო ასეთ სიმახინჯეებში, არამედ ამით ხდება „ტროლების“ სპონსორობა, ამ სიძულვილის დასპონსორება, ამით ხდება ბევრი მედია საშუალებების შენახვა, რომლებსაც ათეულობით მილიონიანი ზარალი აქვთ“, - განაცხადა გოგიჩაიშვილმა.

რაც შეეხება „ქართული ოცნებიდან“ წასულ დეპუტატებს, გოგიჩაიშვილის თქმით, ისინი საქართველოს ინტერესების წინააღმდეგ მოქმედებენ. გოგიჩაიშვილის განცხადებით, ეს დეპუტატები პოლიტიკოსები არ არიან და „ხალხის ძალა“ განწირულია.

„ეს ჯგუფი არის განწირული. ამ ხალხმა თავისი თავი თვითონ ჩაიგდეს ამ მძიმე მდგომარეობაში, იმიტომ რომ მე არ მჯერა, რომ ამ ქვეყანაში რუსეთის პოლიტიკა გაიმარჯვებს. რუსეთი საქართველოში ალბათ, ვეღარ დაბრუნდება იმ ფორმით, რა ფორმითაც რუსეთს ამ ქვეყანაში დაბრუნება უნდა, როგორც არიან ჩეჩნეთში, დაღესტანში,“ - განაცხადა ლევან გოგიჩაიშვილმა.