„დროას“ თავმჯდომარის ელენე ხოშტარიას განცხადებით, სანქციებთან დაკავშირებით თავმოყრილი აქვთ დოკუმენტები, რომლითაც დასტურდება როგორც ირანული თვითმფრინავების გადაფრენა, ასევე ინფორმაცია გემებზე, რომლებიც საქართველოში შემოდიოდა.

როგორც ხოშტარიამ ჟურნალისტებს განუცხადა, მათი ინფორმაცია ეყრდნობა სხვადასხვა გამოძიებას, რომელიც შემდეგ საერთაშორისო პარტნიორების მიერაა გადამოწმებული.

„ეს არის პროცესი, რომელშიც ვთანამშრომლობთ საერთაშორისო ინსტიტუტებთან უკრაინაში და მის მიღმა. ამ პროცესში გვინდა, რომ ინფორმაცია, რასაც ეყრდნობა არგუმენტები სანქცირებასთან დაკავშირებით, იყოს გამჭვირვალე. თავმოყრილი გვაქვს ირანული თვითმფრინავების გადაფრენის დამადასტურებელი დოკუმენტები, ასევე დოკუმენტები გემებზე, რომლებიც შემოდიოდა და მათზე საჯარო პასუხი გაურკვეველი იყო ან დამაკმაყოფილებელი არ იყო. ასევე, მაგალითად, ბიძინა ივანიშვილის გარემოცვის უშუალო კონტაქტები რუსულ ბიზნესებთან. ჩვენ თავმოყრილი გვაქვს უმეტესწილად გამოძიებები, როგორც „საერთაშორისო გამჭვირვალობის“, ასევე სხვადასხვა საგამოძიებო ჟურნალისტის. ყველაფერი ეს გადამოწმებულია ჩვენი საერთაშორისო პარტნიორების მხრიდან. მაგალითად, უჩა მამაცაშვილს რაც შეეხება - გარდა წარსულში არსებული კონტაქტებისა, მას უშუალოდ ომის პერიოდშიც ჰქონდა საერთო ბიზნესი სანქცირებულ პორტაჩენკოსთან, შვილის მეშვეობით. ის ასევე რეგულარულად დადის მოსკოვში“,- განაცხადა ელენე ხოშტარიამ.