თუ სააპელაციო სასამართლომ ბუნდოვანების შესაქმნელად მიიღო სხვა პოლიტიკური გადაწყვეტილება, გაგვიხარდება, რომ კონკრეტული პოლიტიკური პატიმარი თავისუფალი იქნება, მაგრამ ეს არ შეცვლის ქვეყნის დიდ პრობლემას, რომ გვყავს ოლიგარქი, რომელიც ყველაფერს აკონტროლებს და შეუძლია ასეთ უტიფარ საქმეზე ადამიანის დაჭერა, სანამ ძალაუფლება აქვს, - ამის შესახებ „ევროპული საქართველოს“ თავმჯდომარე გიგა ბოკერიამ განაცხადა, რითაც გამოეხმაურა ხვალ სააპელაციო სასამართლოში ნიკა გვარამიას საქმეზე გადაწყვეტილების გამოცხადების ჩანიშვნას.

როგორც ბოკერია აცხადებს, თუ აღნიშნულ საქმეს ზედაპირულად შევხედავთ, ბიძინა ივანიშვილის სტრატეგიაა, რომ გვარამია არ უნდა გაუშვას.

„მე ან ჩემ გარშემო ადამიანებს არ გვაქვს არანაირი დამატებითი ინფორმაცია იმის შესახებ, არსებობს თუ არა რაიმე, უკვე მიღებული გადაწყვეტილება, ან მიიღებს თუ არა რაიმე განსხვავებულ გადაწყვეტილებას. ზედაპირზე რომ შევხედოთ იმას, რისთვისაც [ბიძინა ივანიშვილმა] ეს უტიფარი საქმე გააკეთა (ძალის დემონსტრირებისთვის, რომ ასეც ბოდვაზეც კი შემიძლია ადამიანის დაჭერაო), მაშინ თითქოს არ უნდა გაუშვას და ეს მისი სტრატეგიაა“,- განაცხადა ბოკერიამ, რომლის კომენტარს „ევროპული საქართველოს“ პრესსამსახური ავრცელებს.

ცნობისთვის, „მთავარი არხის" დამფუძნებლის ნიკა გვარამიას, კახაბერ დამენიასა და ზურაბ იაშვილის ბრალდების სისხლის სამართლის საქმეზე მოსამართლეთა კოლეგია გადაწყვეტილებას ხვალ, 2 ნოემბერს გამოაცხადებს.

როგორც „ინტერპრესნიუსს“ ნიკა გვარამიას ადვოკატმა ბექა ბასილაიამ განუცხადა, განაჩენის გამოცხადება 11:00 საათზეა ჩანიშნული. აღნიშნულ საქმეზე მოსამართლეთა კოლეგია სათათბიროდ 24 ოქტომბერს გავიდა.