20 ნოემბერს ბათუმი ფესტივალ „განდაგანას“ უმასპინძლებს

20 ნოემბერს, ბათუმი სოფლის ტურიზმის ფესტივალს „განდაგანას“ უმასპინძლებს. ინფორმაციას აჭარის ტურიზმის დეპარტამენტი ავრცელებს. მათივე ცნობით, სოფლის ტურიზმის პოპულარიზაციის მიმართულებით ყველაზე საინტერესო და პოპულარული ფესტივალი ტრადიციულად ევროპის მოედანზე ჩატარდება.

ერთი დღით, აჭარის ხუთივე მუნიციპალიტეტი მხოლოდ მისთვის დამახასიათებელი ნაწარმით, პროდუქტით, ხელნაკეთი ნივთებით, ტრადიციებითა და ფოლკლორით ბათუმის შუაგულში იქნება წარმოდგენილი.

„წელს ავთენტური, აჭარული დეკორაციებით გაფორმებული ფესტივალის მთავარი თემა აჭარული ნაქარგობები იქნება, რომლის დეკორაციებითაც საფესტივალო სივრცე გაფორმდება. მთელი დღის განმავლობაში ფესტივალის სტუმრებს საშუალება ექნებათ მონაწილეობა მიიღონ ქორეოგრაფიულ და კულინარიულ მასტერკლასებში, ჩურჩხელის ამოვლების, ჭაჭის გამოხდის, თუთუნის დაჭრისა და საწნახელში ყურძნის დაწურვის პროცესში.

„განდაგანას“ ფარგლებში ასევე მოეწყობა კულინარიული შეჯიბრება, რომელზეც გუნდები კულინარიული გზამკვლევიდან ,,კულინარიული მოგზაურობა აჭარაში“ რამდენიმე მივიწყებულ კერძს მოამზადებენ. სტუმრებს კი აჭარული კერძების დაგემოვნება შეეძლებათ.

წელს, პირველად სტუმრებისთვის გასართობი თამაშის სახის გაცოცხლდება უძველესი საწესჩვეულებო რიტუალი - ,,ფადიკო“, რომელიც ხალხური დღესასწაულის ბერიკაობის აჭარული ნაირსახეობაა. წარმოდგენა ქალაქის ქუჩებში დაიწყება და ერას მოედანზე დასრულდება. ფესტივალის სტუმრების განწყობაზე ადგილობრივ ფოლკლორულ ჯგუფებთან ერთად ზვიად ბოლქვაძე და ბენდი, ასევე კახაბერი და ხანუმები იზრუნებენ.

სოფლის ტურიზმის ფესტივალი „განდაგანა“ 2015 წლიდან, აჭარის ტურიზმის დეპარტამენტის ტურისტული პროდუქტების განვითარების სააგენტოს ორგანიზებით იმართება. მისი მიზანი აჭარული სოფლების პოპულარიზაცია, წარმოჩენა და სოფლად ტურისტების მოგზაურობის სტიმულირებაა. ფესტივალი 2020-2022 წლებში არ ჩატარებულა“,- აღნიშნულია გავრცელებულ ინფორმაციაში.