აჭარაში სერვისის გაუმჯობესების მიზნით ტრენინგები გრძელდება. აჭარის ტურიზმის დეპარტამენტმა საგანმანათლებლო პროგრამები მიმტანების მუშაობის ძირითადი პრინციპების, სასტუმროებსა და კვების ობიექტებში გაყიდვების მართვის, ასევე ადმინისტრატორების საერთაშორისო სტანდარტების მიმართულებით განაახლა.

ინფორმაციას აჭარის ავტონომიური რესპუბლიკის მთავრობის ტურიზმისა და კურორტების დეპარტამენტი ავრცელებს.

მათივე ცნობით, ტრენინგების სერია მიმტანების თეორიულ-პრაქტიკული სწავლებით გაიხსნა, რომელზეც სერვისის სტანდარტები, რესტორნის სტრუქტურა, მომსახურების თანმიმდევრობა, კომუნიკაციის ფსიქოლოგია, კონფლიქტური სიტუაციების მოგვარების ალგორითმი და სხვა მნიშვნელოვანი საკითხები განიხილეს. ტურიზმის დეპარტამენტის სატრენინგო პროგრამაში რეგიონში მოქმედი ტურისტული სექტორის წარმომადგენლებია ჩართული.

„აჭარის ტურიზმის დეპარტამენტი რეგიონში მომსახურების ხარისხის გაუმჯობესების მიზნით ტრენინგ-სემინარებს სექტორს ყოველწლიურად სთავაზობს. მხოლოდ მიმდინარე წელს, რეგიონში ტურიზმის სფეროში დასაქმებული 800-მდე პირის გადამზადება მოხდა. ტრენინგები დეკემბრის ბოლომდე გაგრძელდება. მას საჯარო ლექციები დაასრულებს, რომელშიც ცნობილი სპიკერები იქნებიან ჩართულები. ტრენინგ-სემინარებზე დასწრება უფასოა და მასში მონაწილეობის მსურველებმა რეგისტრაცია serviceajara.ge-ზე უნდა გაიარონ“, - აღნიშნულია გავრცელებულ ინფორმაციაში.