გორის სახელმწიფო უნივერსიტეტში იურიდიული დახმარების სამსახურსა და გორის სახელმწიფო უნივერსიტეტს შორის ურთიერთთანამშრომლობის მემორანდუმს მოეწერა ხელი.
გორის სახელმწიფო უნივერსიტეტის ინფორმაციით, რექტორმა, პროფესორმა გიორგი სოსიაშვილმა იურიდიული დახმარების სამსახურს აქტიურობისა და მხარდაჭერისთვის მადლობა გადაუხადა, ასევე ისაუბრა გორის უნივერსიტეტის სამართლის საბაკალავრო და სამაგისტრო პროგრამების შესახებ.
მათივე ცნობით, მხარეები შეთანხმდნენ, რომ გორის სახელმწიფო უნივერსიტეტის სამართლის სკოლის სტუდენტები სტაჟირებას გაივლიან გორის იურიდიული დახმარების ბიუროში, სადაც მენტორი-ადვოკატების ზედამხედველობით დაეუფლებიან ადვოკატის პრაქტიკულ უნარ-ჩვევებს. გარდა ამისა, სტუდენტები აქტიურად ჩაერთვებიან იურიდიული დახმარების სამსახურის პროექტებში, რომელიც მოსახლეობის სამართლებრივი ცნობიერების ამაღლებას ისახავს მიზნად.
მემორანდუმზე ხელმოწერის შემდეგ იურიდიული დახმარების სამსახურის დირექტორმა რაჟდენ კუპრაშვილმა უნივერსიტეტის ადმინისტრაციასა და სტუდენტებთან გამართულ შეხვედრაზე საქართველოში მოქმედი უფასო სამართლებრივი დახმარების სისტემის, იურიდიული დახმარების სამსახურის სერვისების და მიმდინარე პროექტების შესახებ ისაუბრა.