იურიდიულ საკითხთა კომიტეტმა პირველი მოსმენისთვის, დაჩქარებული წესით, სახელმწიფო უსაფრთხოების სამსახურის შესახებ კანონში შესატანი ცვლილება განიხილა, რომლის თანახმად, სახელმწიფო უსაფრთხოების სამსახურის მიერ წინა წელს გაწეული საქმიანობის შესახებ ანგარიშს, უშუალოდ სამსახურის უფროსი პარლამენტს, წელიწადში ერთხელ, არაუგვიანეს 15 აპრილისა წარუდგენს. ინფორმაციას საქართველოს პარლამენტი ავრცელებს.
მათივე ცნობით, მოქმედი ნორმის მიხედვით, პარლამენტს ანგარიშს სამსახურის უფროსი ან მისი მოადგილე წარუდგენს.
შემოთავაზებული ცვლილების პარლამენტის მიერ მიღების შემდეგ „საქართველოს სახელმწიფო უსაფრთხოების სამსახურის შესახებ“ კანონი საქართველოს პარლამენტის რეგლამენტთან შესაბამისობაში მოვა.
საქართველოსთვის კანდიდატის სტატუსის მისანიჭებლად ევროკავშირის მიერ განსაზღვრული რეკომენდაციების შესრულების მიზნით, საპარლამენტო კონტროლის მექანიზმების გაძლიერების და დახვეწის მიმართულებით, 2022 წლის 3 ნოემბერს ძალაში შევიდა საქართველოს პარლამენტის რეგლამენტში განხორციელებული ცვლილებები, რომელიც ასევე საქართველოს სახელმწიფო უსაფრთხოების სამსახურის საქმიანობის საჯარო ანგარიშის საქართველოს პარლამენტისთვის წარდგენის წესს შეეხო.
კანონპროექტის ინიციატორები საქართველოს პარლამენტის წევრები ირაკლი ქადაგიშვილი და ირაკლი შატაკიშვილი არიან.
