პარლამენტის თავმჯდომარის პირველი მოადგილე გია ვოლსკი საქართველოში ვიზიტით მყოფ გერმანიის ფედერაციული რესპუბლიკის ბუნდესტაგის დელეგაციას შეხვდა. ამის შესახებ ინფორმაციას საქართველოს პარლამენტის პრესსამსახური ავრცელებს.

შეხვედრის ერთ-ერთი მთავარი თემა იყო საქართველოში გერმანიის ბუნდესტაგის „საერთაშორისო საპარლამენტო სტიპენდიის" (IPS) პროგრამისთვის მონაწილეთა შერჩევა.

„ვისაუბრეთ პრაქტიკული განათლების მიღების საგანგებო მნიშვნელობაზე. აღნიშნული პროგრამის ფარგლებში, საქართველოში ყოველწლიურად ტარდება სტუდენტების შერჩევა, რომლებიც შემდგომ პრაქტიკას გერმანიის ბუნდესტაგში გადიან. სწორედ, ამ მიზნით იმყოფება ეს დელეგაცია ჩვენს ქვეყანაში და უახლოეს პერიოდში ჩვენი რამდენიმე სტუდენტი, სხვა ქვეყნების სტუდენტებთან ერთად, პრაქტიკას ბუნდესტაგში გაივლის.

დელეგაციის წევრებთან, აგრეთვე ვისაუბრეთ მსოფლიოში მიმდინარე პროცესებზე, საქართველოს მისწრაფებებზე ევროკავშირის სტრუქტურებში გასაერთიანებლად", - განაცხადა შეხვედრის დასრულების შემდეგ გია ვოლსკიმ.

შეხვედრას ქართული მხრიდან, ასევე, ესწრებოდა იურდიულ საკითხთა კომიტეტის თავმჯდომარე და გერმანიის ფედერაციული რესპუბლიკის პარლამენტთან მეგობრობის ჯგუფის წევრი ანრი ოხანაშვილი.