დევნილ მოსახლეობას სამედიცინო გამოკვლევები ჩაუტარდათ
აფხაზეთის ოკუპირებულ ტერიტორიაზე მცხოვრებ და აფხაზეთიდან დევნილ მოსახლეობას სამედიცინო ცენტრ „ვივამედში“ სამედიცინო გამოკვლევები ჩაუტარდათ. ამის შესახებ ინფორმაციას აფხაზეთის ავტონომიური რესპუბლიკის მთავრობა ავრცელებს.
მათი ინფორმაციით, გამოკვლევების მიმდინარეობას აფხაზეთის მთავრობის თავმჯდომარის მოადგილე ანზორ მარგიანი, აფხაზეთის ავტონომიური რესპუბლიკის იძულებით გადაადგილებულ პირთა მინისტრის პირველი მოადგილე გურამ მისაბიშვილი და სამინისტროს წარმომადგენლები ესწრებოდნენ.
„აქციის ფარგლებში, 100-მდე აფხაზეთის ოკუპირებულ ტერიტორიაზე მცხოვრებ და აფხაზეთიდან იძულებით გადაადგილებულ პირს სხვადასხვა პროფილის მაღალკვალიფიციური ექიმ-სპეციალისტის კონსულტაცია და კვლევები ჩაუტარდა. ასევე, ბენეფიციარებს ოფთალმოლოგების დანიშნულების შესაბამისად საჭირო სათვალეები უფასოდ გადაეცათ.
ღონისძიება აფხაზეთის ავტონომიური რესპუბლიკის იძულებით გადაადგილებულ პირთა სამინისტროს ორგანიზებით, „ადამიანის უფლებათა საერთაშორისო კომისიისა“ (International Human Rights Commission) და არასამთავრობო ორგანიზაცია „ქართული ოცნება-ჯანმრთელი მომავლის“ მხარდაჭერით განხორციელდა.
აქციის მიზანია დევნილი მოსახლეობის ჯანმრთელობის მდგომარეობის გამოკვლევა და მაღალკვალიფიციური სამედიცინო მომსახურებით უზრუნველყოფა“, - აღნიშნულია გავრცელებულ ინფორმაციაში.
v-if="article.gallery" v-html="article.gallery"
