მიმაჩნია, რომ ამდენი საუკუნის შემდეგ ქართველები, რომლებიც იბრძვიან საქართველოსთვის უკრაინაში, რომლებიც ბოლო ათწლეულების განმავლობაში განსაკუთრებით სხვადასხვა ფრონტზე იბრძოდნენ და ჩვენ ქვეყანას იცავდნენ, კვდებიან სამშობლოსთვის. ისინი ეძებენ სიკვდილს სამშობლოსთვის, - ამის შესახებ ოპოზიციის წევრმა, არმაზ ახვლედიანმა პარლამენტის პლენარულ სხდომაზე განაცხადა.

მან მიმართა პარლამენტის თავმჯდომარეს შალვა პაპუაშვილს.

„ბატონო თავმჯდომარევ, პირველ რიგში, მინდა თქვენ გითხრათ მადლობა იმიტომ, რომ როდესაც სესია გახსენით, სამძიმარი უთხარით ოჯახებს და გვითხარით ყველას, გულისტკივილი გამოთქვით და იქ, წერტილი დასვით. ნორმალური ის არის, როდესაც იქ, წერტილს დასვამ, მერე არ განაგრძობ და არ მიაკუთვნებ გმირობას და გმირების სახელებს პარტიას, არ დაყოფ მხარეებს, ამ ტრაგედიას და იმავდროულად, უპირველესად გმირობას არ გამოიყენებ კვლავ დაყოფისთვის, დაშლისთვის და პოლარიზებისთვის. ამიტომ, ჩემი მადლობა თქვენ, პერსონალურად.

დღეს, დიდი ქართველი მეფის ხსენების დღეა და ყველამ, ვინც აქ დარბაზში ვართ, ვიცით მისი ერთგვარი ანდერძი -„ეძიებდით ქრისტესთვის სიკვდილსა“. მიმაჩნია, რომ ამდენი საუკუნის შემდეგ ქართველები, რომლებიც იბრძვიან საქართველოსთვის უკრაინაში, რომლებიც ბოლო ათწლეულების განმავლობაში განსაკუთრებით სხვადასხვა ფრონტზე იბრძოდნენ და ჩვენ ქვეყანას იცავდნენ, კვდებიან სამშობლოსთვის. ისინი ეძებენ სიკვდილს სამშობლოსთვის. ამიტომ, ამის ოდნავ მაინც გაფერმკრთალება ვფიქრობ, ძალიან, ძალიან უხერხულია სხვა სიტყვა რომ არ გამოვიყენო.

არ შემიძლია ახლა ვილაპარაკო მიმდინარე საკითხებზე, იმაზე, თუ რა უნდა განვიხილოთ ამ კვირაში, იმიტომ, რომ იმდენად ემოციური, პირდაპირ ვიტყვი, იმდენად დამთრგუნველია ის ფონი, რომ როგორც თქვენ თქვით, განსაკუთრებით ამ ბოლო დღეებში ერთბაშად ამდენი ქართველი ვაჟკაცი ემსხვერპლა პირსისხლიანი ჯალათის ახირებას უკრაინაში", - განაცხადა ახვლედიანმა.

მისივე თქმით, ამ ადამიანების უკვდავსაყოფად ყველა მათგანმა უნდა გააკეთოს ის, რომ საქართველო აქციოს ნორმალურ სახელმწიფოდ.

„ნორმალურობის ერთადერთი ხაზი არის საქართველოს თანამედროვე დემოკრატიული, სამართლიან სახელმწიფოდ გადაქცევა. ეს კი, ამ პირობებში შეუძლებელია, შეუძლებელია ნორმალური არჩევნების გარეშე, შეუძლებელია, როცა მესამე პრეზიდენტი ასე გვიკვდება ციხის თუ სხვა საავადმყოფოში", - აცხადებს არმაზ ახვლედიანი.