ფარისევლობის კლასიკური მაგალითია ევროპარლამენტში გამართული დებატების ის ნაწილი, როდესაც პოლარიზაციასა და პოლარიზაციის დასრულების სურვილზე საუბრობ და სწორედ შენი გამოსვლით რადიკალიზმს აღვივებ და აძლიერებ საქართველოში, - ეს განცხადება ჟურნალისტებთან პარლამენტის თავმჯდომარემ შალვა პაპუაშვილმა გააკეთა.

მისივე შეფასებით, საქართველოს პრობლემაა არა პოლარიზაცია, არამედ რადიკალიზაცია და რადიკალური ჯგუფები, თუმცა ამის დასრულების რეცეპტი არსებობს. პაპუაშვილმა ამ კონტექსტში ყურადღება ევროკავშირის 12 რეკომენდაციის შესრულების მიზნით პარლამენტში შექმნილ სამუშაო ჯგუფებზე გაამახვილა.

„როდესაც ჩვენ 12-პუნქტზე ვმუშაობდით, იმ პარტიებს შორის, რომლებიც სამუშაო ჯგუფებში იყვნენ ჩართული, ალბათ აკვირდებოდით, რომ არის საკმაოდ კონსტრუქციული, საქმიანი და კრიტიკული დისკუსია და ურთიერთობა, ხოლო ის პარტიები, რომლებიც სამუშაო ჯგუფში არ იყვნენ ჩართული და რადიკალურ პოზიციებზე იყვნენ, ერთის მხრივ, არიან რადიკალები და მეორეს მხრივ, ქვეყანაში პოლარიზაციას უზრუნველყოფენ. სწორედ ამ ჯგუფების წახალისება ხდება ისეთი განცხადებებით, რაც არის საქართველოს წინააღმდეგ დეზინფორმაციის გავრცელება მიტაცებულ სახელმწიფოზე, ოლიგარქიზაციაზე და ასე შემდეგ. საბოლოდ ჯამში, ეს სიტყვები და ტერმინები საქართველოსთან მიმართებაში გაცვდა“, - განაცხადა შალვა პაპუაშვილი.