„ნაციონალური მოძრაობის“ თავმჯდომარეობის კანდიდატის, გიორგი მუმლაძის შეფასებით, ექსპრეზიდენტ მიხეილ სააკაშვილის სასამართლო პროცესის გადადება ნიშნავს იმას, რომ შესაძლოა, გამოტანილი იყოს სასიკვდილო განაჩენი.

როგორც მან ჟურნალისტებს განუცხადა, სააკაშვილის მხარდასაჭერად საპროტესტო აქციები გაიმართება და ამის შესახებ უახლოეს პერიოდში ეცნობება საზოგადოებას.

„როგორც მოსალოდნელი იყო, „ქართული ოცნების“ ხელისუფლება თავის უფლებამოსილებას ბოროტად იყენებს და სურს, ეს პროცესი სამართლებრივად წარმოაჩინოს. ამ პროცესთან სამართალს არავითარი კავშირი არ აქვს, ეს არის ჩვეულებრივი პოლიტიკური პროცესი, რომელიც ბიძინა ივანიშვილის დაკვეთით ხორციელდება. ამიტომ, სასამართლოს გადადება პირდაპირ ნიშნავს იმას, რომ მიხეილ სააკაშვილისთვის ამით შესაძლოა, გამოტანილი იყოს სასიკვდილო განაჩენი. ჩვენ როცა ვამბობთ მობილიზებას, მობილიზება სასამართლოს ეზოში არ მოხდება, მოხდება იქ, სადაც ბიძინა ივანიშვილი შეწუხდება და შეწუხდებიან ის პირები, რომლებმაც უშუალოდ მიიღეს მისი ციხეში ჩატოვების და მისი ციხეში მოკვლის დავალება პუტინის მიერ. ამიტომ, ჩემს მეგობრებთან ერთად, მაქსიმალურად შევეცდები უახლოეს დღეებში გამოვაცხადო კონკრეტული გეგმა, თუ როდის დავიწყებთ აქციებს, სად იქნება ეს აქციები და რა ფორმატით",-განაცხადა მუმლაძემ.

მან ასევე აღნიშნა, რომ მიხეილ სააკაშვილის სიცოცხლეზე პასუხისმგებლობა ხელისუფლებას ეკისრება.

„მიხეილ სააკაშვილის ციხეში ყოფნა, პუტინის პირადი დავალებით, არის შესრულებული ბიძინა ივანიშვილის მიერ. მისი ჯანმრთელობის უმძიმესი მდგომარეობა თავიდან ბოლომდე, ბიძინა ივანიშვილის პასუხისმგებლობაა. მიხეილ სააკაშვილს კლავენ ამ ფორმალური პროცედურებით“,-განაცხადა მუმლაძემ.