სიმართლე არის ჩვენს მხარეს, საქართველოს მხარეს და დარწმუნებული ვარ, ეს საერთაშორისო სამართლებრივი გადაწყვეტილებები ჯერ სტრასბურგში, შემდეგ კი ჰააგაში, დაეხმარება საქართველოს, რომ აღადგინოს თავისი ტერიტორიული მთლიანობა, - ამის შესახებ პარლამენტის ვიცე-სპიკერმა არჩილ თალაკვაძემ ჟურნალისტებთან ჰააგის სასამართლოს მიერ აგვისტოს ომის საქმეზე გამოძიების დასრულების საკითხზე კომენტირებისას განაცხადა.

მან ასევე აღნიშნა, რომ გამოჩნდა, რამდენად "ანტისახელმწიფოებრივი იყო "ნაციონალური მოძრაობის" მაშინდელი დელეგაციის მხრიდან ევროპის საბჭოში რეზოლუციაზე ხელის მოწერა".

"ჰააგის პროკურორის გადაწყვეტილება არის ჩვენი ქვეყნის, ხელისუფლების და საზოგადოების კიდევ ერთი წარმატება საერთაშორისო ასპარეზზე სიმართლისთვის ბრძოლაში და ჩვენმა ხელისუფლებამ გააკეთა ყველაფერი, რომ ეს სამართლიანი გადაწყვეტილება დამდგარიყო, რაც საჯაროდ გახდა ცნობილი. სიმართლე არის ჩვენს მხარეს, საქართველოს მხარეს და დარწმუნებული ვარ, ეს საერთაშორისო სამართლებრივი გადაწყვეტილებები ჯერ სტრასბურგში, შემდეგ კი ჰააგაში, დაეხმარება საქართველოს, რომ აღადგინოს თავისი ტერიტორიული მთლიანობა. ძირითადი სამუშაო ჩატარდა ჩვენი ხელისუფლების პირობებში, ჰააგაში ამ გამოძიების მასალებს თან ერთოდა, ასევე, საქართველოს მაშინდელი ომბუდსმენის, სოზარ სუბარის და მისი ოფისის მიერ მოპოვებული მასალები, მათ შორის მეც, როცა პირადად გახლდით აგვისტოს ომის დღეებში ომის ზონაში, 22 სოფელში, იქ შეგროვებული ინფორმაცია ჰუმანიტარული პირობების, ადამიანების მკვლელობების, მათი დევნის შესახებ და სპეციალური ანგარიში, რომელიც სოზარ სუბართან ერთად მისმა ოფისმა მაშინ მოვამზადეთ, თან ერთოდა საგამოძიებო მასალებს. ჩვენ გვჯეროდა, რომ სიმართლე იქნებოდა აღიარებული. გამოძიების ამ გადაწყვეტილების შემდეგ საკითხი განხილული უნდა იყოს ჰააგის სასამართლოში, სადაც ჩვენ ველოდებით, რომ საქართველოს სიმართლე გაიმარჯვებს და საერთაშორისო დონეზე მოხდება იმის დეკლარირება, რომ რუსეთის ფედერაცია უკანონო ოკუპაციას ახორციელებს და მძიმე დარღვევები ჩაიდინა აგვისტოს ომის დროს. ეს გადაწყვეტილება კიდევ ერთხელ აჩვენებს, რამდენად არასწორი და ანტისახელმწიფოებრივი იყო "ნაციონალური მოძრაობის" მაშინდელი დელეგაციის მხრიდან ევროპის საბჭოში იმ რეზოლუციაზე ხელის მოწერა, სადაც "ნაციონალური მოძრაობა" და მაშინდელი ხელისუფლება სწორედ საკუთარ ქვეყანას და საკუთარ ჯარისკაცებს აბრალებდნენ საომარი მოქმედებების დაწყებას და მშვიდობიან მოსახლეობაზე თავდასხმას. კიდევ ერთხელ მოხდა ლუსტრაცია, თუ როგორ ხდებოდა საკუთარი ქვეყნის ინტერესების გაცვლა და უგულებელყოფა", - განაცხადა თალაკვაძემ.