გორში, სუხიშვილის ქუჩაზე მცხოვრებთა ნაწილმა სასმელი წყლის შეუზღუდავად მიწოდების მოთხოვნით გორის გასასვლელში მდებარე სუხიშვილის ქუჩა გადაკეტა.

შეკრებილთა განცხადებით, პრობლემის მოგვარების თხოვნით წყალმომარაგების კომპანიას არაერთხელ მიმართეს, თუმცა, აღნიშნულ უბანში სასმელი წყლის მიწოდება ვერ დარეგულირდა, რის გამოც უკიდურეს ზომებს მიმართავენ.

აქციის გამო სუხიშვილის ქუჩაზე ავტოტრანსპორტის მოძრაობა დაახლოებით 20 წუთით შეფერხდა, გზის სავალი ნაწილის გათავისუფლება და მოძრაობის აღდგენა საპატრულო პოლიციის ჩარევის შედეგად მოხერხდა.

აქციის მონაწილეთა თქმით, თუ უახლოეს დღეებში შესაბამისი სამსახურების ხელმძღვანელები მოსახლეობას არ შეხვდებიან და პრობლემას ვერ მოაგვარებენ, პროტესტის ნიშნად აქციებს კვლავ გამართავენ.