საქართველოს ყოფილი პრეზიდენტისთვის, მიხეილ სააკაშვილისთვის სასჯელის გადავადების, ან სასჯელისგან გათავისუფლებასთან დაკავშირებით, სასამართლო პროცესი 29 დეკემბერს, 11:00 საათზე გადაიდო.

ყოფილი პრეზიდენტის ადვოკატის, შალვა ხაჭაპურიძის განცხადებით, სააკაშვილის ჯანმრთელობის მდგომარეობა რთულია, დინამიკაში მისი ჯანმრთელობის მდგომარეობა უარესდება, შესაბამისად, სხდომები ყოველდღიურად უნდა ჩანიშნულიყო.

მოსამართლე გიორგი არევაძის განცხადებით კი, ყოველდღიურად პროცესების ჩანიშვნა შეუძლებელია, ვინაიდან მან დღეს ჩასატარებელი პროცესებიც კი გადადო, ამასთან, საპატიმრო ვადები გადის სხვადასხვა საქმეზე, რომელიც უნდა დაასრულოს.

არევაძის თქმით, შუამდგომლობის განხილვის ვადაში შეზღუდულები არ არიან, შესაბამისად, მოლოდინი არ უნდა იყოს, რომ გადაწყვეტილება ერთ ან ორ პროცესში მოხდება.

შემდეგი სასამართლო პროცესი კვლავ მოწმეთა დაკითხვით გაგრძელდება.