ობიექტური წინაპირობები იმისა, რომ პრეზიდენტმა მიხეილ სააკაშვილის შეწყალების საკითხზე საკუთარი არგუმენტირებული პოზიცია შეცვალოს, ობიექტურად არ არსებობს, - ეს განცხადება ჟურნალისტებთან პარლამენტის ადამიანის უფლებათა დაცვის კომიტეტის თავმჯდომარემ მიხეილ სარჯველაძემ გააკეთა.

სარჯველაძემ ხაზგასმით აღნიშნა, რომ პოზიცია, რაც ამ თემაზე სალომე ზურაბიშვილს ჰქონდა, არის სწორი და მართებული და არ არსებობს ობიექტური გარემოება, რამაც პრეზიდენტს საკუთარი პოზიციის შეცვლა შეიძლება აიძულოს.

"მართებული და არგუმენტირებული იყო პრეზიდენტის ის პოზიცია, რომელიც მან მიხეილ სააკაშვილის შეწყალების საკითხზე არც თუ ისე დიდი ხნის წინ გამოხატა.

არსებობს თუ არა მიზეზი იმისა, რომ პრეზიდენტმა საკუთარი გადაწყვეტილება შეცვალოს? - პირადად არ მგონია, რომ ამის რაიმე ობიექტური მიზეზი არსებობს!

ადგილი აქვს ცალკეული ადამიანების მცდელობებს, ვითარება იმდაგვარად წარმოაჩინონ, თითქოს გარემოებები თვისობრივად შეცვლილია", - განაცხადა მიხეილ სარჯველაძემ