ირაკლი ქარსელაძე ანაკლიის პორტზე - სახელმწიფოს ჩართულობა იქნება უფრო მიმზიდველი ინვესტორებისთვის, რომ ეს უმნიშვნელოვანესი პროექტი განხორციელდეს
რეგიონული განვითარებისა და ინფრასტრუქტურის მინისტრის, ირაკლი ქარსელაძის განცხადებით, ანაკლიის პორტის მშენებლობაში სახელმწიფოს ჩართულობა პროექტის განსახორციელებლად ინვესტორებისთვის უფრო მიმზიდველი იქნება.
როგორც ქარსელაძემ ჟურნალისტებს განუცხადა, უკვე შექმნილია პორტამდე მისასვლელი გზის და რკინიგზის პროექტი.
„ანაკლიის პროექტთან დაკავშირებით დაწინაურებულები ვართ იმ მიმართულებით, რომ პორტამდე მისასვლელი გზის და რკინიგზის პროექტი უკვე მომზადებულია.
როდესაც ასეთი მნიშვნელოვანი პროექტის განხორციელება დაიწყება, აღნიშნული გზის და რკინიგზის განვითარება აღარ დაელოდება პროექტის მომზადებას და მომზადებული პროექტით განხორციელდება.
სახელმწიფო იყო აღნიშნული პროექტის ინიციატორი. სახელმწიფოს ყოველთვის უნდოდა, უნდა და ენდომება აღნიშნული პროექტის განხორციელება, უბრალოდ ამისთვის საჭიროა, რომ განმახორციელებლები სრულად ჩართულნი იყვნენ და ვალდებულებების ფარგლებში ავითარებდნენ პროექტს. ამ შემთხვევაში სახელმწიფოს ჩართულობა, ვფიქრობთ, იქნება უფრო მიმზიდველი ინვესტორებისთვის, რომ ეს უმნიშვნელოვანესი პროექტი განხორციელდეს”,- განაცხადა ირაკლი ქარსელაძემ.
