ვფიქრობ, სალომე ზურაბიშვილსაც ძალიან კარგად ესმის, რომ იმ შემთხვევაში, თუ მიხეილ სააკაშვილი ასეთი ველური ანგარიშსწორების მსხვერპლი იქნება, საქართველოსთვის ევროპული კარი ყოველთვის დახურული იქნება - ვფიქრობ, შესაძლოა გვქონდეს მოლოდინი, რომ ზურაბიშვილმა ქვეყნისთვის სასარგებლო გადაწყვეტილება მიიღოს, - ამის შესახებ "ნაციონალური მოძრაობის" წევრმა, ნუგზარ წიკლაურმა ჟურნალისტებთან საუბრისას განაცხადა.

მისივე თქმით, საქართველოს მესამე პრეზიდენტ მიხეილ სააკაშვილთან დაკავშირებით მოსამართლის გადაწყვეტილება ნებისმიერ შემთხვევაში პოლიტიკური იქნება და განაჩენს მოსამართლის ნაცვლად, ხელისუფლება გამოიტანს.

„სალომე ზურაბიშვილს აქვს ნამდვილად ისტორიული შანსი, რომ ამაღლდეს რაღაც პიროვნულ წყენებზე, პიროვნულ შურისძიებებზე მესამე პრეზიდენტის მიმართ და მიიღოს გადაწყვეტილება საქართველოს ევროპული გზის მხარდასაჭერად. ყველას კარგად ესმის და მე ვფიქრობ, სალომე ზურაბიშვილსაც ძალიან კარგად ესმის, რომ იმ შემთხვევაში, თუ ასეთი ველური ანგარიშსწორების მსხვერპლი იქნება მიხეილ სააკაშვილი, საქართველოსთვის ევროპული კარი ყოველთვის დახურული იქნება. ამიტომ ამ დილემის წინაშე არის ახლა ის და ძალიან მნიშვნელოვანია, რომ მან მიიღოს გადაწყვეტილება საქართველოს სახელით და არა რაღაც პოლიტიკური შურისძიების სახელით“, - განაცხადა ნუგზარ წიკლაურმა.