რუსთავში საშობაო ღონისძიებებისა და კონცერტისთვის ემზადებიან

რუსთავში, საქართველოს პრემიერ მინისტრის ინიციატივის, „ახალი წლის დღეები საქართველოში“ ფარგლებში, საშობაო ღონისძიებებისა და კონცერტისთვის ემზადებიან.

რუსთავის მერიის ინფორმაციით, თავისუფლების მოედანზე ამ დროისთვის საშობაო სოფლის მოწყობა, საახალწლო დეკორაციებისა და სცენის მონტაჟი მიმდინარეობს და ქალაქის მთავარ მოედანზე, საახალწლო ღონისძიებები 15:00 საათზე დაიწყება.

მათივე ცნობით, საშობაო სოფელში, ადგილობრივი მცირე მეწარმეების მონაწილეობით, ხელნაკეთი ნივთების გამოფენა-გაყიდვა გაიმართება, მოეწყობა საბავშვო სივრცეები, სადაც პატარებს ზღაპრის გმირები გაართობენ, თოვლის ბაბუა კი საჩუქრებს დაურიგებთ.

„გაიმართება ორკესტრისა და ზღაპრის გმირების საზეიმო მსვლელობა. 19:00 საათზე, ანსამბლ ,,ქართული ხმებისა და ბენდის მონაწილეობის კონცერტი დაიწყება, 20:00 საათზე კი მთავარ ნაძვის ხესთან შეკრებილებისთვის ჯგუფი ,,რეგიონი“ იმღერებს. საღამოს დუტა სხირტლაძე გაუძღვება. სადღესასწაულო კონცერტი 21:00 საათზე საზეიმო ფოიერვერკით დასრულდება“, - აღნიშნულია ინფორმაციაში.