პაატა ზაქარეიშვილი - ეჭვი მეპარება ისეთი ოპონენტი, კონკურენტი და მეტოქე, როგორც სააკაშვილია, ცოცხალი გაუშვან ციხიდან - არ მგონია, რომ მისი სიკვდილი უნდათ, მაგრამ უნდათ მისი დაბეჩავებული მდგომარეობა

ვხედავთ, როგორ არ ჩამოდის სცენიდან სააკაშვილი, მსოფლიოში საქართველოზე მის გამო საუბრობენ, - ამის შესახებ პოლიტოლოგმა პაატა ზაქარეიშვილმა „პალიტრანიუსის“ გადაცემა „დღის ნიუსრუმში“ საქართველოს მესამე პრეზიდენტზე, მიხეილ სააკაშვილზე საუბრისას განაცხადა.

პაატა ზაქარეიშვილის თქმით, მიხეილ სააკაშვილის თემა არის ნიმუში იმისა, როგორი „ავადმყოფია არა სააკაშვილი, არამედ სახელმწიფო“.

„აღტაცებული ვარ, ეს ერთი ადამიანი, როგორ ქმნის თავისი თავისგან პოლიტიკოსს და ანგარიშგასაწევ ძალას. მისი ავადმყოფობა და ციხეში ყოფნაც კი, საავადმყოფოში ყოფნაც კი, ყველაფერი პოლიტიკური დღის წესრიგია.

ვხედავთ, როგორ არ ჩამოდის სცენიდან, მასზე საუბრობენ საქართველოში და მსოფლიოში საქართველოზე მის გამო საუბრობენ. ზოგადად, ეს არ არის კარგი, მაგრამ ეს არის რეალობა, კეთილი უნდა ვინებოთ და რეალობას თვალი უნდა გავუსწოროთ.

ჩემთვის ყველაზე მიუღებელია უკვე არა სააკაშვილის და „ნაციონალური მოძრაობის“ ბედი, არამედ როგორ მოქმედებს სახელმწიფო, როგორ ხდება შურისძიება ძველი ხელისუფლების მიმართ, ეს არის გამაოგნებელი. სააკაშვილი ჩემთვის არის ნიმუში იმისა, როგორი ავადმყოფია არა სააკაშვილი, არამედ სახელმწიფო“, - განაცხადა პაატა ზაქარეიშვილმა.

ასევე, პაატა ზაქარეიშვილის განცხადებით, მას ეჭვი ეპარება, რომ „ქართულმა ოცნებამ“ მიხეილ სააკაშვილი ციხიდან გაუშვას, რადგან მათ მიხეილ სააკაშვილის „დაბეჩავებული“ მდგომარეობა სჭირდებათ.

“ “ქართული ოცნება“ იმდენად არის ჩაბღაუჭებული ძალაუფლებაზე, იმდენად ყველაფრის მკადრებელია, რომ ეჭვი მეპარება ისეთი ოპონენტი, კონკურენტი, მეტოქე, როგორც სააკაშვილია, ცოცხალი გაუშვან ციხიდან. მე არ მგონია, რომ მისი სიკვდილი უნდათ, მაგრამ მათ უნდათ მისი დაბეჩავებული მდგომარეობა. ღმერთმა დაიფაროს და თუ გარდაიცვალა, ეს არ იქნება კარგი საქართველოსთვის, მაგრამ არ იქნება ტრაგედია „ქართული ოცნებისთვის“. მათ ურჩევნიათ, რომ არ მოკვდეს და მომაკვდავ სააკაშვილს მუდმივად ყურადღება მიჰქონდეს. წელი მთავრდება და იწყება მისი თემით, ხოლო სიღარიბე, ეკონომიკა, გეოპოლიტიკური გამოწვევები, უმუშევრობა - არაფერზე არ არის საუბარი. ეს უნდა „ქართულ ოცნებას“. მათ იციან, რომ ოპოზიცია არის სუსტი, ამიტომ ურჩევნიათ სააკაშვილის „ჰაერში ყოფნა“. განეიტრალება იქნებოდა უკრაინაში რომ გაეშვათ ომის დროს, მაგრამ მათ სჭირდებათ ასეთი სააკაშვილი, თან იქნება აქტიური თემა და თან არ გადავა წითელ ხაზებს. ჯერჯერობით ამ ტემპერატურას იკავებენ, თუმცა შეიძლება სიტუაცია გაექცეთ ხელიდან“, - განაცხადა პაატა ზაქარეიშვილმა.

პაატა ზაქარეიშვილმა გადაცემაში საქართველოს პრეზიდენტის, სალომე ზურაბიშვილის მიერ მიხეილ სააკაშვილის შეწყალების შესაძლებლობაზეც ისაუბრა.

მისი თქმით, ზურაბიშვილის განცხადებებში პოზიციის ცვლილებები შეინიშნება, თუმცა არ ჩანს, რომ სააკაშვილს აუცილებლად შეიწყალებს.

„პოზიციის ცვლილებებს ვხედავ, მაგრამ არა იმდენად, რომ აუცილებლად შეიწყალებს. მან ზედიზედ ორჯერ მკაფიოდ და ცალსახად თქვა: „არა და არასდროს“, ის ამას აღარ იმეორებს. ეს იმას შეიძლება ნიშნავდეს, რომ გამორიცხული არაფერი არაა, მაგრამ ეს არ ნიშნავს, რომ აუცილებლად შეიწყალებს. მან შუალედური პოზიცია დაიკავა და ეს არის შეტყობინება პირველ რიგში ხელისუფლებისათვის, რომ მიხედეთ სააკაშვილს იმიტომ, რომ გამორიცხული არაფერია, თუ სხვა გზა არ იქნება, შეიძლება მომიწიოს, რომ შევიწყალო“, - განაცხადა პაატა ზაქარეიშვილმა.

რობინ დანიგანი - ვცდილობთ თუ არა ქართველი ხალხის დასანქცირებას? ცალსახად არა! ჩვენ გვსურს საუკეთესო ამ ქვეყნისთვის და გვსურს, რომ ეს ქვეყანა წარმატებული იყოს
ესტონეთის ელჩი - თუ გვინდა ევროკავშირის წევრობა, უნდა ვითამაშოთ წესების მიხედვით - საქართველოს ხელისუფლება ამბობს, რომ უახლოვდება ევროკავშირს, მაგრამ მათი ქმედებები ამას არ ადასტურებს
ალექსანდრე თვალჭრელიძე - ძალიან მინდა დავიჯერო, რომ ჩინური კომპანიის შერჩევა პროექტის განსახორციელებლად უბრალოდ გაუაზრებელი ნაბიჯია და არა პოლიტიკური ტრენდის შეცვლის შემაშფოთებელი ნიშანი
მწვანე განვითარების მხარდაჭერა თუ ხელის შეშლა - „ჭარბი საწარმოო სიმძლავრის“ თეორიის სიყალბე
„საქკაბელმა“ ბრონირებული NAYBY კაბელის წარმოება დაიწყო
4 რჩევა სამსუნგის ინჟინრებისგან თუ როგორ გამოიყენო Windfree კონდიციონერი ყველაზე ეფექტურად
ბათუმში „ლისი დეველოპმენტის“ ახალი პროექტის - ბუკნარის პრეზენტაცია გაიმართა
ქართული პრესის მიმოხილვა 20.06.2024