ხათუნა სამნიძე - Human Rights Watch-ის ანგარიში კიდევ ერთხელ ადასტურებს, რომ „ქართული ოცნებისთვის“ ადამიანის უფლებები პრიორიტეტი არ არის - ეს არის კიდევ ერთი დარტყმა ქვეყნის იმიჯზე

Human Rights Watch-ის ანგარიში კიდევ ერთხელ ადასტურებს, რომ „ქართული ოცნებისთვის“ ადამიანის უფლებები პრიორიტეტი არ არის, - ამის შესახებ ჟურნალისტებთან „რესპუბლიკური პარტიის“ თავმჯდომარემ, ხათუნა სამნიძემ განაცხადა.

მისივე თქმით, ანგარიში ასახავს ქვეყანაში არსებულ ვითარებას ადამიანის უფლებების თვალსაზრისით და ის არის კიდევ ერთი დარტყმა ქვეყნის იმიჯზე.

„ასეთი დასკვნები კიდევ ერთი დარტყმაა ქვეყნის იმიჯზე, ეს არის ჩვენს ქვეყანაში მიმდინარე პროცესის შეჯამება, სადაც ექსტრემისტული ჯგუფები და ულტრამემარჯვენეები თავს ესხმიან ჟურნალისტებს და დღესაც არ არიან ეს ადამიანები დასჯილნი, სახელმწიფო იღებს ადამიანის უფლებებზე სახელმწიფო სტრატეგიას, სადაც უმცირესობის უფლებები არ არის ნახსენები. ეს ყველაფერი კიდევ ერთხელ ადასტურებს, რომ „ქართული ოცნებისთვის“ ადამიანის უფლებები არ არის პრიორიტეტი სამწუხაროდ“, - განაცხადა სამნიძემ.

Human Rights Watch-ის მიერ საქართველოში 2022 წელს განვითარებული მოვლენების შეფასების თაობაზე ანგარიშში ნათქვამია, რომ მედიის თავისუფლების მხრივ მდგომარეობა გაუარესდა, რაც მედიის წარმომადგენლებზე გახშირებული თავდასხმებით და კრიტიკული ტელეარხის დირექტორის დაპატიმრებით გამოიხატა.