„ერთიანი ნაციონალური მოძრაობის“ თავმჯდომარეობის ერთ-ერთი კანდიდატის, ლევან ხაბეიშვილის წარმომადგენლის, ლაშა ფარულავას განცხადებით, დღეიდან მათ ყველა ამომრჩეველსა და მხარდამჭერს შესაძლებლობა აქვს, ელექტრონულ პლატფორმაზე დარეგისტრირდეს.

როგორც ფარულავა აღნიშნავს, გარკვეულწილად „ნაციონალური მოძრაობა“ დემოკრატიულობის ტესტს ატარებს.

„ნაციონალური მოძრაობის“ ყველა ამომრჩეველს, მხარდამჭერს, გულშემატკივარს, დღეიდან შესაძლებლობა აქვს, ელექტრონულ პლატფორმაზე დარეგისტრირდეს და ბლოკჩეინ ტექნოლოგიის გამოყენებით, 28 იანვრიდან ხმა მისცეს „ერთიან ნაციონალურ მოძრაობაში“ ცვლილებებს, მეტ ენერგიას და მოძრაობას, რომელიც საქართველოს ევროპულ მომავალს მოუტანს და საქართველოს კეთილსინდისიერ ადამიანებს შეუქმნის იმ ელემენტარულ, მნიშვნელოვან, სოციალურ პირობებს, რომელიც საქართველოს ყველა მოქალაქისთვის აუცილებელია. რაც შეეხება ფარულობას, რა თქმა უნდა, კომისია კონსენსუსის საფუძველზე იღებს ყველა გადაწყვეტილებას, ჩვენ ერთმანეთს ვენდობით, ამიტომაც შევარჩიეთ ინოვაციური, ციფრული, თანამედროვე ტექნოლოგია, რომელიც ინოვაციურია და ეს არის რეალურად საარჩევნო რეფორმაც, გარკვეულწილად „ნაციონალური მოძრაობა“ დემოკრატიულობის ტესტს ატარებს მიუხედავად უამრავი გამოწვევისა. ამისკენ მოვუწოდებთ ყველა პოლიტიკურ პარტიას, ვიანიდან ნებისმიერი პოლიტიკური პარტია მოქალაქეთა ინტერესებს უნდა ეფუძნებოდეს.

ბლოკჩეინის სისტემა და ციფრული ტექნოლოგია შესაძლებლობას იძლევა, რომ ამ ტიპით ჩავატაროთ არჩევნები და ქვეყანაში ადამიანებს განწყობა, ნდობა შევუქმნათ არჩევნების მიმართ. „ნაციონალურმა მოძრაობამ“ გადადგა ეს ნაბიჯი, ინოვაციური, თანამედროვე ტექნოლოგია აირჩია შიდა დემოკრატიის თვალსაზრისით. დარწმუნებული ვარ, „ნაციონალური მოძრაობა“ ამ ტექნოლოგიის გამოყენებაზე ეროვნულ დონეზეც იმუშავებს“, - განაცხადა ფარულავამ.

ცნობისთვის, „ერთიან ნაციონალურ მოძრაობაში” პარტიის თავმჯდომარის არჩევნებში მონაწილეობის მსურველთათვის რეგისტრაცია დაიწყო. პარტიის ოფისში საარჩევნო კომისიის წევრები კონსულტაციას მართავენ, სადაც განიხილავენ არჩევნებთან დაკავშირებით ტექნიკურ საკითხებს, თუ ვინ შეძლებს ხმის მიცემას და როგორ იქნება შესაძლებელი ონლაინ რეგისტრაცია. რეგისტრაცია, რომელიც დღეს, 13 იანვარს დაიწყო, 26 იანვარს დასრულდება.