დღეს დაიწყო საქართველოს პრემიერ-მინისტრის, ირაკლი ღარიბაშვილის სამუშაო ვიზიტი შვეიცარიაში. კერძოდ, დავოსში მსოფლიო ეკონომიკური ფორუმი მიმდინარეობს, რომელსაც ძალიან მნიშვნელოვანი ორი განზომილება აქვს. პირველი, პოლიტიკური შეხვედრები. მეორე ეკონომიკური განზომილება,- ამის შესახებ საქართველოს საგარეო საქმეთა მინისტრმა ილია დარჩიაშვილმა დავოსში განაცხადა, სადაც პრემიერის დელეგაციის შემადგენლობაში იმყოფება.

მისი თქმით, პრემიერს სხვადასხვა ქვეყნის ლიდერთან რამდენიმე მნიშვნელოვანი ორმხრივი შეხვედრა აქვს დაგეგმილი.

„პრემიერ-მინისტრი დღეს შეხვდება შვეიცარიის პრეზიდენტს, რაც ვფიქრობ მასპინძელი ქვეყნის პირველ პირთან შეხვედრა ძალიან მნიშვნელოვანია.

საქართველოს პრემიერ-მინისტრს და დელეგაცის წევრებს დაგეგმილი აქვთ ასევე საინტერესო შეხვედრები სხვადასხვა მსხვილი საერთაშორისო კომპანიების ხელმძღვანელებთან“, - განაცხადა ილია დარჩიაშვილმა.

მისივე თქმით, მსხვილი საერთაშორისო კომპანიების ხელმძღვანელებთან შეხვედრის მთავარი მიზანია მათ უკეთ გააცნონ საქართველოს ეკონომიკური პოტენციალი.

„ამ შეხვედრების მთავარი მიზანია მათ უკეთ გავაცნოთ ჩვენი ქვეყნის ეკონომიკური პოტენციალი, ის საინვესტიციო გარემო, რომელიც არის ქვეყანაში, რაც მათ მისცემს საშუალებას ჩვენი ქვეყნის პოტენციალი კარგად შეაფასონ და გადადგან ქმედითი ნაბიჯები იმისთვის, რომ საქართველოში ეს კომპანიები შემოვიდნენ და გააკეთონ კონკრეტული ინვესტიციები",- აღნიშნა ილია დარჩიაშვილმა.

ინფორმაციას მთავრობის ადმინისტრაციის პრესსამსახური ავრცელებს.