ღრმა მწუხარებას გამოვთქვამ საგარეჯოში, გვიან ღამით მომხდარი ტრაგედიის გამო, - ამის შესახებ კახეთის სახელმწიფო რწმუნებული, გიორგი ალადაშვილი სოციალურ ქსელში წერს.
გიორგი ალადაშვილი გარდაცვლილთა ოჯახის წევრებს სამძიმარს უცხადებს.
"ღრმა მწუხარებას გამოვთქვამ საგარეჯოში, გვიან ღამით მომხდარი ტრაგედიის გამო, რომელსაც რამდენიმე ადგილობრივისა და შინაგან საქმეთა სამინისტროს თანამშრომლის სიცოცხლე ემსხვერპლა. ვიზიარებ ამ დიდ მწუხარებას და ვუსამძიმრებ დაღუპულთა ოჯახებს, ნათესავებსა და სრულიად საქართველოს. გულწრფელ სამძიმარს ვუცხადებ გმირი პოლიციელის ოჯახს, ახლობლებსა და შინაგან საქმეთა სამინისტროს თანამშრომლებს.
დაშავებულებს ვუსურვებ მალე გამოჯანმრთელებას და ოჯახებში მშვიდობით დაბრუნებას,"- აღნიშნავს გიორგი ალადაშვილი.
ინფორმაციას კახეთის მხარეში სახელმწიფო რწმუნებულის ადმინისტრაცია ავრცელებს.
შეგახსენებთ, რომ შინაგან საქმეთა სამინისტროს ინფორმაციით, საგარეჯოში მომხდარი შემთხვევის შედეგად გარდაიცვალა 5 და დაიჭრა კორპუსის ეზოში მყოფი 5 ადამიანი. გარდაცვლილთაგან 1 პოლიციელი, 4 კი იმ კორპუსის მცხოვრებია, სადაც ყოფილმა სამხედრომ ცეცხლი გახსნა. ამასთან, გამოძიების ინფორმაციით, საცხოვრებელი კორპუსის ერთ-ერთი ბინის აივნიდან რამდენიმე გასროლა 1974 წელს დაბადებულმა ნ.ა.-მ განახორციელა. მათივე ცნობით, აღნიშნულმა პირმა, მოგვიანებით, სპეცდანიშნულების რაზმის გამოჩენისთანავე, სავარაუდოდ, თვითლიკვიდაცია განახორციელა.
