პარლამენტის ვიცე-სპიკერის, არჩილ თალაკვაძის განცხადებით, ევროპის საბჭოს საპარლამენტო ასამბლეამ დაამტკიცა რეზოლუცია საქართველოს დელეგაციის მიერ შეთავაზებული ცვლილებით, რომელიც ოკუპირებულ ტერიტორიებთან დაკავშირებით ქართული საზოგადოების დამოკიდებულებას გამოხატავს.

თალაკვაძის შეფასებით, აღნიშნული ცვლილების მხარდაჭერა ადასტურებს, რომ საქართველოს საკითხი საერთაშორისო დღის წესრიგში პრიორიტეტულად რჩება.

„ევროპის საბჭოს საპარლამენტო ასამბლეამ მაღალი მხარდაჭერით დაამტკიცა რეიკიავიკის სამიტთან დაკავშირებული რეზოლუცია, მათ შორის ცვლილება, რომელიც ჩვენ მიერ იყო შეთავაზებული. ჩვენს დელეგაციას ძალიან ძლიერი პოზიცია ჰქონდა ამასთან დაკავშირებით და რეზოლუცია საბოლოო ჯამში, გამოხატავს იმ პოზიციას, რომელიც ჩვენს საზოგადოებას საქართველოს ოკუპირებულ ტერიტორიებთან დაკავშირებით აქვს. ეს გადაწყვეტილება კიდევ ერთხელ ადასტურებს, რომ საქართველოს საკითხი საერთაშორისო დღის წესრიგში პრიორიტეტულად რჩება და ამას ადასტურებს ასამბლეის მაღალი მხარდაჭერა ჩვენ მიერ შეთავაზებულ ცვლილებაზე. რეიკიავიკის სამიტისთვის მზადება დაწყებულია. ეს იქნება მაღალი დონის ფორუმი, სადაც კიდევ ერთხელ გვექნება საშუალება, გამოვხატოთ მხარდაჭერა უკრაინის მიმართ და ასევე, საერთაშორისო საზოგადოება კიდევ ერთხელ დააფიქსირებს საქართველოს ტერიტორიული მთლიანობის მიმართ მხარდაჭერას და მოუწოდებს რუსეთის ფედერაციას, რომ ჩვენი ტერიტორიიდან ჯარები გაიყვანოს. ამის მყარი საფუძველი უკვე არის რეზოლუცია, რომელიც საპარლამენტო ასამბლეამ ახლახან დაამტკიცა“, - განაცხადა არჩილ თალაკვაძემ.