ქართული პრესის მიმოხილვა 26.01.2023

“არჩევნებმა კომიკური სახე მიიღო” - ვახტანგ ძაბირაძე ენმ-ის არჩევნებზე

“დასავლეთმა ფსიქოლოგიური ბარიერი გადალახა” - უკრაინისთვის სტრატეგიული შეიარაღების გადაცემა იწყება

რამდენად მნიშვნელოვანია ევროსაბჭოს საქართველოს მხარდამჭერი რეზოლუცია და რა მოხდება რეიკიავიკის სამიტზე

* * *

“არჩევნებმა კომიკური სახე მიიღო” - ვახტანგ ძაბირაძე ენმ-ის არჩევნებზე

“ნაციონალური მოძრაობის” თავმჯდომარეობის არჩევნებამდე 3 დღე რჩება და პოლიტიკურ სპექტრში დაძაბულობა კულმინაციას აღწევს. თავმჯდომარეობის კანდიდატი ლევან ხაბეიშვილი აცხადებს, რომ ყველა ბარიკადს გადალახავს და იბრძოლებს ბოლომდე, მათ შორის ფიზიკურ წინააღმდეგობაში. “არ ვაპირებ, რამეზე უკან დავიხიო და ჩვენს წინ არსებული ბარიკადი არ გადავლახო. თუ საჭირო გახდა სააკაშვილს ფიზიკურადაც გამოვიხსნით. ხელისუფლება არის უკვე კანონგარეშე, მე მგონია, რომ ჩვენი მხრიდან ყველა მოქმედება იქნება ლეგიტიმური. ქვეყანას სჭირდება პოზიტიური ცვლილებები, რევოლუციურად სწრაფად, მათ შორის რევოლუციური ცვლილებებია საჭირო”, - აცხადებს ხაბეიშვილი. კანდიდატის ამ განცხადებას უკვე მოჰყვა შეფასებები პოლიტიკურ წრეებში. ოპოზიციაში აცხადებენ, რომ პოლიტიკური მიზნებისთვის საბრძოლველად ათასი გზა არსებობს, გარდა ძალადობისა და კანონის დარღვევისა, არეულობა კი დაუშვებელია”, - წერს გაზეთი “რეზონანსი” სტატიაში, სათაურით “არჩევნებმა კომიკური სახე მიიღო” - ვახტანგ ძაბირაძე ენმ-ის არჩევნებზე.

“მელიას მომხრეებისთვის სააკაშვილის სახელით სპეკულირება ბოლო დღეებში ამაზრზენი და ცუდი საყურებელი გახდა. ხატია დეკანოიძე კი ასეთ განცხადებებს საფრთხილოს უწოდებს და ამბობს, რომ არ შეიძლება ამომრჩევლისთვის ისეთი დაპირების მიცემა, რომელიც პარაქტიკულად შეუსრულებელია. “ოცნებაში” კი აცხადებენ, რომ ხაბეიშვილის განცხადება პათეტიკური და უპასუხისმგებელოა, რომელსაც განხორციელება არ უწერია. როგორ დასრულდება შიდაპარტიული არჩევნები ენმ-ში, ექსპერტები დამაიმედებელ პროგნოზს ვერ აკეთებენ, პოლიტოლოგი ვახტანგ ძაბირაძე აცხადებს, რომ შიდაპარტიული დაპირისპირება უკვე იმ მასშტაბისაა, რომ ერთობის შენარჩუნება რთული იქნება, პარტია ან ორად გაიყოფა ან საერთოდ დაიშლება. ზოგადად კი “ნაცმოძრაობის” არჩევნებმა კომიკური სახე მიიღო. პოლიტოლოგი რამაზ საყვარალიძე კი არჩევნებადე დარჩენილ დღეებში “კომპრომეტების გამოგდებას” არ გამორიცხავს”, - აღნიშნავს გამოცემა.

“ორი დღე დარჩა და არა მგონია, რამე განსაკუთრებული მოხდეს, მაგრამ, თუკი რამე კომპრომატი აქვთ დარჩენილი ერთმანეთზე აუცილებლად დაიდება. ქვეყანაში არჩევნები კომპრომატების გარეშე ვეღარც წარმოგვიდგენია, მაგრამ, არ მეგონა, რომ პარტიის შიგნით არჩევნები ასე ჩატარდებოდა, კომიკური სახე მიიღო ამ არჩევნებმა. რაც შეეხება კანდიდატების გამარჯვების შანსებს, მელიას და ხებეიშვილს თანაბარი შანსები აქვთ, მაგრამ ვინც არ უნდა გაიმარჯვოს, დაპირისპირება იმ დონემდეა მისული, იმედი სისაძაგლე ამოუყარეს ერთმანეთს, რომ არა მგონია შეძლონ ერთობის შენარჩუნება. დაპირისპირება გაგრძელდება და დიდი ალაბთობით პარტია გაიყოფა. ამ მოცემულობაში სააკაშვილი რჩება მაყურებლის როლში და ასე დარჩება, შედეგს დაელოდება. ხელს აძლევს გაყოფა, რადგან ორივე მხარე მაინც მასზე ილაპარაკებს” - აცხადებს გამოცემის კორესპონდენტთან საუბრისას ვახტანგ ძაბირაძე.

“ამ ხნის განმავლობაში არც ერთ მხარეს არ უსაუბრია არჩევნებზე, საარჩევნო კამპანია როგორ მზადდებოდა. იყო მხოლოდ ერთმანეთის მიმართ მწვავე კრიტიკა და საუბარი რევოლუციაზე. ასეთი პასაჟი, თუნდაც ფრაგმენტული, რომელიც მოვისმინეთ, მიუთითებს იმაზე, რომ მიზანი არის ხელისუფლების სწრაფად შეცვლა. არჩევნებამდე დარჩენილ დღეებში არ არის გამორიცხული რომ ერთი-ორი კომპრომატი კიდევ გამოაგდონ ან სხვა ხერხები და მექანიზმები იყოს გამოყენებული. რაც შეეხება სააკაშვილის ფაქტორს ამ არჩევნებში, არა მგონია, რომ ის ამ პროცესებში ჩართული იყოს, რადგან ერთხელ უკვე იწვნია დარტყმა კეზერაშვილისგანაც და მელიასგანაც. ამიტომ შეიძლება რაღაც ხაფანგი უფრო გააკეთოს, ბოლო მომენტში ორივე კანდიდატი ხაბეიშვილი და მელია ხახამშარლი დატოვოს და დაიყვიროს - გაუმარჯოს მამულაშვილსო”, - მიიჩნევს გამოცემის კორესპონდენტთან საუბრისას რამაზ საყარელიძე.

“დასავლეთმა ფსიქოლოგიური ბარიერი გადალახა” - უკრაინისთვის სტრატეგიული შეიარაღების გადაცემა იწყება

“დასავლეთი გადამწყვეტ ნაბიჯს დგამს და უკრაინას მათთვის სტრატეგიულად მნიშვნელოვან საბრძოლო ტანკებს უგზავნის. როგორც ანალიტიკოსები ამბობენ, დასავლეთმა ფსიქოლოგიური ბარიერი გადალახა და არაა გამორიცხული, რომ გადამწყვეტი შეტევითი ოპერაციის დროს, დამატებითი შეტევითი იარაღის გაგზავნა კიდევ მოუწიოს. ამასთან, ექსპერტები ამბობენ, რომ კრემლს დიდი ალბათობით უკვე ნაფიქრიც ექნება “ლეოპარდებს” რა დაუპირისპიროს, მეტიც, მორიგი ბირთვული მუქარის ნაბიჯები უკვე გადადგა კიდეც. თუმცა, რამდენად შორს წავა, ეს უკვე ფრონტზე არსებულ მდგომარეობასთანაა კავშირში. აშშ მზადაა დაიწყოს პროცესი, რომელიც უკრაინისთვის “მ1 აბრამსი” ტანკების გაგზავნას ითვალისწინებს, გერმანული გამოცემა “შპიგელი” კი წერს, რომ გერმანია უკრაინას “ლეოპარდ 2” ტანკებს გადასცემს - საუბარია უკრაინისთვის “ლეოპარდ 2” ტანკების მინიმუმ ერთი შენაერთის გადაცემაზე, რაც ნატოს სტანდარტებით ტექნიკის 14 ერთეულს შეადგენს”, - წერს გაზეთი “რეზონანსი” სტატიაში სათაურით “დასავლეთმა ფსიქოლოგიური ბარიერი გადალახა” - უკრაინისთვის სტრატეგიული შეიარაღების გადაცემა იწყება.

“ტანკები ბუნდესვერის მარაგებიდან იქნება მიწოდებული. ამასთან, გამოცემა წერს, რომ საშუალო და გრძელვადიან პერსპექტივებში შესაძლოა დამატებითი ტანკები იქნას გამზადებული გასაგზავნად იმ მარაგებიდან, რომლებიც გერმანულ მრეწველობას გააჩნია. გამოცემის თანახმად, გადაწყვეტილებას, აშკარაა, წინ უძღოდა მოკავშირეებთან მრავალდღიანი კონსულტაციები, განსაკუთრებით აშშ-სთან. გერმანიის კანცლერი ოლაფ შოლცი აღნიშნავდა, რომ უკრაინისთვის საბრძოლო ტანკების გადაცემას მხოლოდ სხვა ქვეყნებთან კოალიციაში განიხილავდა. ნორვეგიული გაზეთები წერენ, რომ ნორვეგიის მთავრობა განიხილავს, გაუგზავნოს თუ არა უკრაინას მის საკუთრებაში არსებული “ლეოპარდ 2”-ის რამდენიმე ტანკი, მედიის ცნობით, რუსეთის მოსაზღვრე ნორვეგია ნატო-ს წევრი სახელმწიფოა, რომელსაც ამ ტიპის 36 ტანკი აქვს და უკრაინას შესაძლოა, ოთხი ან რვა აღნიშნული სახეობის საბრძოლო ტანკი გადასცეს. რუსეთი კი ემზადება აგრესიის ახალი ტალღისთვის იმ ძალებით, რომლის მობილიზებაც შეუძლია. ოკუპანტები უკვე ზრდიან ზეწოლას ბახმუტში, ვუჰლედარსა და სხვა მიმართულებებით და მათ სურთ გაზარდონ ზეწოლა უფრო ფართო მასშტაბით, - ამის შესახებ უკრაინის პრეზიდენტმა, ვოლოდიმირ ზელენსკიმ განაცხადა. მისი თქმით, იმისათვის, რომ არ აღიარონ აგრესიის შეცდომა, რუსეთის ხელისუფლებას სურს, რომ ბრძოლაში მეტი თავისი ხალხი და აღჭურვილობა ჩააბას”, - აღნიშნავს გამოცემა.

“ეს ნიშნავს, რომ ყველამ, თავისუფალ სამყაროში, უნდა გავაძლიეროთ ჩვენი თანამშრომლობა, რათა არა მხოლოდ ვუპასუხოთ რუსეთის რეგულარულ დანაშაულებს, არამედ რუსეთის ახალი კრიმინალური ქმედებები შეძლებისდაგვარად აღვკვეთოთ. ჩვენმა ძალებმა უნდა შეინარჩუნონ ინიციატივა ომში”, - თქვა ზელენსკიმ. მან უკრაინისთვის ტანკების მიწოდების საკითხზე მიმდინარე დისკუსიებზეც ისაუბრა - “სხვათა შორის, ტანკებზე ახლა ბევრს საუბრობენ. იმ თანამედროვე ტანკების შესახებ, რომელიც ჩვენ გვჭირდება და იმაზე, თუ როგორ უნდა შეივსოს ეს დეფიციტი. დიდი ძალისხმევა, ბევრი სიტყვა და დაპირებაა, მაგრამ მნიშვნელოვანია რეალობის დანახვა: ეს არ ეხება 5, 10 ან 15 ტანკს. საჭიროება უფრო დიდია. ჩვენ ყოველდღიურად ვაკეთებთ ყველაფერს, რაც საჭიროა დეფიციტის შესავსებად და მადლობელი ვარ ყველასი, ვინც ამაში გვერდში გვიდგას, თუმცა, დისკუსია უნდა დასრულდეს გადაწყვეტილებით. ჩვენს მოკავშირეებს აქვთ ტანკების საჭირო რაოდენობა”, - აღნიშნა ზელენსკიმ”, - განაგრძობს გამოცემა.

“ვაშინგტონის მიერ უკრაინისთვის საბრძოლო ტანკების შესაძლო მიწოდება რუსეთის წინააღმდეგ კიდევ ერთი აშკარა პროვოკაცია იქნება, - ამის შესახებ ამერიკის შეერთებულ შტატებში რუსეთის ელჩმა ანატოლი ანტონოვმა განაცხადა. “აშკარაა, რომ ვაშინგტონი მიზანმიმართულად ცდილობს სტრატეგიული მარცხი განგვაცდევინოს. თუ ამერიკის შეერთებული შტატები გადაწყვეტს ტანკების მიწოდებას, მაშინ მსგავსი ნაბიჯის გამართლება “თავდაცვითი იარაღის” არგუმენტებით ნამდვილად არ იმუშავებს. ეს იქნება კიდევ ერთი აშკარა პროვოკაცია რუსეთის ფედერაციის წინააღმდეგ”, - აღნიშნა რუსეთის ელჩმა. თსუს პროფესორი და ანალიტიკოსი კორნელი კაკაჩია “რეზონანსთან” აცხადებს, რომ ეს დასავლეთის მთელი რესურსი არაა და გამორიცხული არაა, რომ დამატებით კიდევ გაგზავნოს, რადგან ფსიქოლოგიური ბარიერი უკვე გადალახა. საპირისპიროს ფიქრობს „რეზონანსთან სამხედრო ექსპერტი ვახტანგ მაისაია, მას მიაჩნია, რომ ესაა ის კრიტიკული ზღვარი, რასაც დასავლეთი უკრაინაში აგზავნის”, - დასძენს გამოცემა.

“ეს ძალიან პატარა, მაგრამ ფსიქოლოგიურად და პოლიტიკურად ძალიან მნიშვნელოვანი დახმარებაა, თუმცა, ისე არ უნდა გავიგოთ, რომ დასავლეთს მთელი თავისი რესურსები აქვს ჩადებული, ეს ალბათ დასაწყისია. სიტუაცია ფრონტზე ძალიან მყიფეა, აქედან გამომდინარე, ალბათ ყველა მიხვდა, რომ უკრაინას დღეს სასწრაფო დახმარება სჭირდება იმისთვის, რომ ფრონტის ხაზზე რაღაც გარდატეხა შეიტანოს და რაღაც შედეგებზე გავიდნენ, ეს გაჭიანურებული ომი არც დასავლეთს და არც არავის არ აწყობს. ეს დახმარება ალბათ ასე უნდა გავიგოთ, რომ ესაა პირველი ნაწილი. ამ იარაღს რაღაც გავლენის მოხდენა შეუძლია, მაგრამ, გარანტირებული არაფერია, რადგან მოსკოვის პასუხი რა იქნება, არ ვიცით, ის ყოველთვის ცდილობს ესკალაციის ფაზა ასწიოს, ამიტომაც არაა გამორიცხული, რომ დასავლეთს სხვადასხვა ტიპის იარაღის დამატებითი დახმარება კიდევ მოუწიოს. ესაა პირველი სერიოზული მცდელობა, როცა დასავლეთმა ფსიქოლოგიური ბარიერი გადალახა, რომ შემდგომში შესაძლოა უკრაინას შეტევითი ხასიათის იარაღი კიდევ მიაწოდოს”, - აცხადებს გამოცემის კორესპონდენტთან საუბრისას კორნელი კაკაჩია.

“სავარაუდოდ შეტევითი ოპერაცია გაზაფხულისთვის იქნება და დასავლეთს კიდევ მოუწევს, რომ საჭირო შეიარაღება დამატებით გაუგზავნოს. რა თქმა უნდა, რუსეთისთვის ეს სასიამოვნო არაა, ახლა ყველა ელოდება თუ რას დაუპირისპირებს ამას და სამხედრო პასუხი რა იქნება, ეს ჯერჯერობით გამოცანად რჩება. დარწმუნებული ვარ უკვე ნაფიქრიც აქვთ თუ “ლეოპარდებს” რა უნდა დაუპირისპირონ. რუსეთი ამბობდა, რომ ყველა ტანკი ფეთქდებაო, ეს კი მართალია, მაგრამ ადვილი განსახორციელებელი არაა. მით უმეტეს იმ ტექნოლოგიური შეზღუდვების ფონზე, რომელიც რუსეთს დღეს აქვს. ფაქტია, რომ ახლა სერიოზული თავსატეხი გაუჩნდათ”, - დაასკვნის კაკაჩია.

“ესაა შეიარაღების კრიტიკული ზღვარი, რასაც დასავლეთი უკრაინაში აგზავნის, უკვე საბრძოლო თვითმფრინავების გადაცემა რჩება და იმედია დასავლეთი ამაზეც წავა. ცოცხალი ძალაც მონაწილეობს, მოხალისეებიც სერიოზულ როლს თამაშობს. ფაქტიურად ძალები გათანაბრებულია, უკრაინაში მთელი დასავლეთი წარმოდგენილია. უკვე დასავლეთსა და რუსეთს სშორის სამხედრო დაპირისპირების პოლიგონად გადაიქცა, ამ გადაწყვეტილების ფონზე ასეა. სიტუაცია როგორ შეიცვლება, ამას დრო გვიჩვენებს, მაგრამ ყოველ შემთხვევაში, ეს წელი გარდამტეხი იქნება. კრემლი დიდი ალბათობით უკან არ დაიხევს და ის კი არა, შესაძლოა სხვა მიმართულებითაც გახსნან რამდენიმე ფრონტი. მაგალითად კავკასიის მიმართულებით”, - აცხადებს გამოცემის კორესპონდენტთან საუბრისას ვახტანგ მაისაია.

“რაც შეხება ნატოს ქვეყნების მისამართით შესაძლო საფრთხეს, რუსეთმა ატლანტიკის ოკეანის მიმართულებით ფრეგატი ადმირალი “გარშკოვი” გააგზავნა, რომელიც სტრატეგიული დამრტყმელი ბალისტიკური რაკეტებით “ცირკონებითაა” აღჭურვილი და უკვე ბერმუდის კუნძულებს მიუახლოვდა, ამერიკისგან 1000 კილომეტრითაა დაშორებული და ამით ბირთვული დარტყმის იმიტაცია შეუქმნა. ეს უკვე რუსეთის ბირთვული მუქარაა, რაც ყველაზე საინტერესოა, რუსული, ჩინური და სამხრეთ აფრიკის რესპუბლკის სამხედრო საზღვაო ფლოტის წარმოადგენლები სამხედრო საზღვაო წვრთნებს გამართავენ, ამაზე მეტი გამოწვევა რა უნდა იყოს. ომი უკვე იმ ფაზაში შვიდა, რომ მხარეებმა ბოლო რესურსამდე უნდა იბრძოლონ, სამწუხარო რეალობაა და ამასთან საქართველო წითელ ზონაშია”, -დასძენს ვახტანგ მაისაია.

რამდენად მნიშვნელოვანია ევროსაბჭოს საქართველოს მხარდამჭერი რეზოლუცია და რა მოხდება რეიკიავიკის სამიტზე

“პარლამენტის ვიცე-სპიკერის, არჩილ თალაკვაძის განცხადებით, ევროპის საბჭოს საპარლამენტო ასამბლეამ მიიღო რეზოლუცია, რომელიც საქართველოს დელეგაციის მიერ ინიცირებულ ცვლილებს ასახავს. ცვლილებები რუსეთის მიერ განხორციელებული აგრესიის და საქართველოს ტერიტორიების ოკუპაციის საერთაშორისო სამართლის პრინციპების უხეშ დარღვევად აღიარებას ითვალისწინებს და საქართველოს ტერიტორიიდან რუსული ჯარების გაყვანას მოითხოვს. ანალიტიკოს კახა გოგოლაშვილის შეფასებით, რეზოლუციის დამტკიცება საქართველოსთვის მნიშვნელოვანი დოკუმენტია. ევროპის საბჭოს საპარლამენტო ასამბლეა მოუწოდებს რუსეთის ფედერაციას გაიყვანოს ჯარები საქართველოდან”, - წერს გაზეთი “რეზონანსი” სტატიაში, სათაურით რამდენად მნიშვნელოვანია ევროსაბჭოს საქართველოს მხარდამჭერი რეზოლუცია და რა მოხდება რეიკიავიკის სამიტზე.

“რეზოლუცია, რომელიც ევროსაბჭოს საპარლამენტო ასამბლეამ მიიღო, ასევე ასახავს იმას რომ რუსეთის ქმედებები უკრაინის წინააღმდეგ იმ პოლიტიკის ნაწილია, რომელსაც რუსეთი 2008 წელს რუსეთი საქართველოს წინააღმდეგ ატარებდა. საქართველოს პარლამენტის დელეგაციის მიერ ინიცირებული ცვლილებები ევროპელმა კოლეგებმა გაიზიარეს და ჩანაწერი რეზოლუციაში შეიტანეს. როგორც ანალიტიკოსი კახა გოგოლაშვილი “რეზონანსთან” საუბარში აღნიშნავს, რუსეთმა დატოვა ევროპის საბჭო და რუსეთზე ზემოქმედების კუთხით ამ რეზოლუციის დამტკიცება ნაკლებად ეფექტიანი იქნება. თუმცა, საერთაშორისო თანამეგობრობის მხრიდან ამ საკითხის აქტუალიზაციას ანალიტიკოსი ძალიან მნიშვნელოვნად განიხილავს. მისივე თქმით, რუსეთის აგრესიის ფონზე, როცა მთელი მსოფლიო ებრძვის რუსეთის აგრესიას უკრაინის მიმართ, ძალიან კარგია თუ საქართველოს საკითხს არ დაივიწყებენ და რუსეთის მიერ საქართველოს ოკუპირებულ ტერიტორიებზეც მოხდება რეაგირება”, - აღნიშნავს გამოცემა.

“ეს რეზოლუცია მნიშვნელოვანია იმ კუთხით, რომ, როდესაც დასრულდება რუსეთ უკრაინის ომი და რუსეთთან გაიმართება ყოვლისმომცველი მოლაპარაკება, ამ მოლაპარაკებაში უნდა შევიტანოთ რუსეთის ჯარების საქართველოდან გაყვანის საკითხი, სავარაუდოდ ამ რეზოლუციას დაამტკიცებენ, ვინაიდან რუსეთმა დატოვა ევროპის საბჭო და არავითარი ბერკეტი რუსეთს აღარ გააჩნია”, - აცხადებს გამოცემის კორესპონდენთან საუბრისას კახა გოგოლაშვილი. რეზოლუცია მაისში რეიკიავიკის სამიტზე უნდა დამტკიცდეს, რომელიც ევროპის საბჭოს სახელმწიფოთა და მთავრობის მეთაურთა შეხვედრაზე მოხდება”, - დასძენს გამოცემა.

ავთანდილ წულაძე - მაკრონის, შოლცისა და ტუსკის შეხვედრის შემდეგ ცხადი გახდა, რომ უკრაინის იარაღის გარეშე დატოვების გეგმა ჩავარდა, ევროპისა და უკრაინა-რუსეთს შორის სამხედრო დაპირისპირება გაგრძელდება  და გაღრმავდება
„საქართველო მეცნიერების ქვეყანაა“ - აკადემიკოსი როინ მეტრეველი
ქართული პრესის მიმოხილვა 18.03.2024
Webster University Georgia-ს ფსიქოლოგიის საბაკალავრო პროგრამა დაემატა
Webster University Georgia-ს კომპიუტერული მეცნიერებების საბაკალავრო პროგრამა დაემატა