პარტიის თავმჯდომარის არჩევნებთან დაკავშირებით რეგისტრაცია დასრულდა, რომელშიც 49 ათასმა ადამიანმა მიიღო მონაწილეობა - ეს ნიშნავს, რომ ელექტორატს სურს ცვლილებები, - ამის შესახებ ჟურნალისტებთან „ნაციონალური მოძრაობის" დეპუტატმა ლევან ბეჟაშვილმა განაცხადა.

ბეჟაშვილი ამომრჩეველს მოუწოდებს მხარი პარტიის განახლებას დაუჭირონ.

„დღეს დასრულდა რეგისტრაცია პარტიის თავმჯდომარის არჩევნებთან დაკავშირებით, 49 ათასმა ადამიანმა მიიღო მონაწილეობა რეგისტრაციაში და 28-29 იანვარს, 48 საათის განმავლობაში ჩატარდება კენჭისყრის ელექტრონული ფორმით გადაწყვეტილების მიღება. ყველა მხარდამჭერს მოვუწოდებთ დაუჭიროს მხარი ცვლილებებს პარტიაში, განახლებას და ახალ ლეგიტიმაციას. ის, რომ 50 ათასამდე დარეგისტრირდა არჩევნებში ეს ნიშნავს იმას, რომ ელექტორატს სურს ახალი ლეგიტიმაცია და ცვლილებები“, - განაცხადა ბეჟაშვილმა.