ივანიშვილის ამბავში ახალი არაფერია. სულ უნდა გვახსოვდეს, როგორი უტიფარია ეს ადამიანი, როდესაც ღიად გვეუბნება, რომ მისი პრობლემების გამო, ქონებისა თუ ფულის თვალსაზრისით, ჩვენი ქვეყნის მომავლით ვაჭრობს, - ასე აფასებს „ევროპული საქართველოს“ თავმჯდომარე, გიგა ბოკერია ბიძინა ივანიშვილის შესახებ CS Victims-ის მიერ გავრცელებულ სტატიას, რომელშიც აღნიშნულია, რომ „ივანიშვილი ადასტურებს პოლიტიკურ ზეწოლას Credit Suisse-თან სამართლებრივ დავაში“.

ბოკერიას თქმით, ბიძინა ივანიშვილს „ეს ქვეყანა თავის საკუთრებად მიაჩნია“.

„პირდაპირ გვითხრა, ძალიანაც არ მოგახვევთ თავზე პრობლემებსო - ცოტათი მოგახვევთო. ასეთი კაცია, თავის საკუთრებად მიაჩნია ეს ქვეყანა. სხვა საკუთრებისა და ქონების პრობლემების გადაჭრის გზად ჩვენი ქვეყნის მომავლით ვაჭრობაში ხედავს“, - განაცხადა გიგა ბოკერიამ.