დარწმუნებული ვარ, კანდიდატები, რომლებმაც წარმატებას ვერ მიაღწიეს, საერთო ენას გამონახავენ - ახლა ერთიანი ოპოზიციური ფრონტი გვჭირდება და ყველასთან თანამშრომლობისთვის მზად ვართ,- ამის შესახებ „სტრატეგია აღმაშენებლის“ წევრმა პაატა მანჯგალაძემ „ნაციონალური მოძრაობის“ თავმჯდომარედ ლევან ხაბეიშვილის არჩევის თაობაზე ჟურნალისტებს განუცხადა.

მანჯგალაძის თქმით, გაერთიანება არა პიროვნებების, არამედ, იდეის გარშემო ხდება და ახლა საერთო ინტერესი ხელისუფლების ჩამოშორებაა.

„მინდა, გამარჯვებულ კანდიდატს მივულოცო. დარწმუნებული ვარ, კანდიდატები, რომლებმაც წარმატებას ვერ მიაღწიეს, გამონახავენ საერთო ენას. არჩევნებში დამარცხება არ ნიშნავს იმას, რომ პარტიიდან წავლენ და გაპასიურდებიან. პირიქით - ახლა გვჭირდება ერთიანი ბრძოლა, ერთიანი ოპოზიციური ფრონტი და რა თქმა უნდა, ყველასთან თანამშრომლობისთვის მზად ვართ.

განხეთქილება, დაპირისპირება ხელისუფლების ინტერესია, ჩვენი ინტერესი კი, ერთიანობაა. საქართველოს გადარჩენის, ევროპასთან ინტეგრაციის და ხელისუფლების ჩამოშორების ამოცანა გვაქვს. არ მაინტერესებს, ვინ რას აკეთებდა წარსულში, მაინტერესებს, რას გავაკეთებთ მომავალში ყველა ერთად. თანამშრომლობას რაც შეეხება, ჩვენ პიროვნებების გარშემო არ ვიკრიბებით, ვიკრიბებით საქართველოს გამთლიანების, საქართველოს ევროპასთან ინტეგრაციის იდეის გარშემო“, - განაცხადა პაატა მანჯგალაძემ.

ცნობისთვის, „ნაციონალური მოძრაობის" თავმჯდომარე ლევან ხაბეიშვილი გახდა. ხაბეიშვილმა ხმების 52.58%-ს მოიპოვა. რაც შეეხება სხვა კანდიდატებს - ნიკა მელიამ ხმების 40% აიღო, გიორგი მუმლაძემ 3.68%, ნონა მამულაშვილმა კი 3.73%.