ახლა არავის ზეიმის და გამარჯვების დრო არ არის. მთავარი გამარჯვება და საზეიმო მაშინ იქნება, როდესაც ბიძინა ივანიშვილის რუსულ რეჟიმს დავამარცხებთ და მიხეილ სააკაშვილის სიცოცხლეს გადავარჩენთ, - ამის შესახებ პარტია „ნაციონალური მოძრაობის“ წევრმა, გიორგი ბოტკოველმა განაცხადა.

მისივე თქმით, არ აქვს სურვილი ვინმემ პარტია „ნაციონალური მოძრაობა“ დატოვოს.

„ახლა არავის ზეიმის და გამარჯვების დრო არ არის. მთავარი გამარჯვება და საზეიმო მაშინ იქნება, როდესაც ბიძინა ივანიშვილის რუსულ რეჟიმს დავამარცხებთ და მიხეილ სააკაშვილის ჯანმრთელობას და სიცოცხლეს გადავარჩენთ და ის თავისუფალი იქნება. რაც შეეხება თანამშრომლობას, მე ვერავისთან პრობლემას ვერ ვხედავ. ნამდვილად, ჩემი მტერი პარტია „ნაციონალურ მოძრაობაში“ არავინ არ არის. ესენი ჩემი თანაგუნდელები არიან. მერე რა, რომ სხვადასხვა აზრზე ვიყავით, მზად ვარ ნებისმიერ მათგანთან თანამშრომლობისთვის. ჩვენ ანგარებით შექმნილი პარტია არ ვყოფილვართ, ჩვენ ვიყავით მუდმივად იდეაზე ორიენტირებული ადამიანები. ვფიქრობ, რომ ყველამ უნდა გავაგრძელოთ ბრძოლა და ამაში მე პრობლემას ვერ ვხედავ. არავითარი სურვილი არ მაქვს, რომ ვინმემ პარტია დატოვოს. თუ ვინმეს ამის სურვილი აქვს, ეს თვითონ უნდა გადაწყვიტოს. პირიქით, მეც და თითოეული ჩვენგანიც, მათ შორის ლევან ხაბეიშვილიც, თითოეული ჩვენგანი ვინც ლევან ხაბეიშვილის კამპანიაში ჩართული ვიყავით, მზად ვართ კი არა და ვალდებულებადაც ვთვლით თავს, რომ არა მარტო ვითანამშრომლოთ, არამედ ვიბრძოლოთ ისევ იმ ადამიანებთან ერთად, რომელიც შეიძლება გუშინ ნიკა მელიას საარჩევნო შტაბს წარმოადგენდნენ“, - განაცხადა გიორგი ბოტკოველმა.