როდესაც პოლარიზაციაზეა საუბარი, ეს ბუნებაში ვერ მოხდება, სანამ პრეზიდენტი ამ მდგომარეობაშია - მინდა ვუთხრა ხელისუფლებას და ბიძინა ივანიშვილს - გამორიცხულია, სხვა თემა არ იარსებებს! როგორც „ნაციონალური მოძრაობის“ არჩეული თავმჯდომარე ყველაფერს გავაკეთებ, რომ დავმობილიზდეთ და სერიოზული მოძრაობა დავიწყოთ ამ მიმართულებით,- ამის შესახებ „ნაციონალური მოძრაობის“ თავმჯდომარე ლევან ხაბეიშვილმა კლინიკა „ვივამედში“ ჟურნალისტებთან საუბრისას განაცხადა.

როგორც ხაბეიშვილი განმარტავს, „ნაციონალური მოძრაობისთვის“ ნომერ პირველი თემა სააკაშვილის ჯანმრთელობა იქნება.

„მძიმეა პრეზიდენტ სააკაშვილის ჯანმრთელობის მდგომარეობა. როგორც პაციენტს, მას რეანიმაციაში გადაყვანა სჭირდება, მაგრამ არ ექცევიან, როგორც პაციენტს. ხელისუფლება ისე ექცევა, როგორც ოპონენტს, პოლიტიკური ნიშნით იზღუდება მისი უფლებები. ნაცვლად იმისა, რომ რეანიმაციაში გადაიყვანონ, სიმაღლეში ოფიციალურად აპატარავებენ. 1.94სმ არის სააკაშვილი და უწერენ რომ 92 არის, რადგან 68 კილოზე ქვემოთ მოდის წონა და კრიტიკულ ზღვარს სცილდება. ამასაც კი კადრულობენ, რომ დოკუმენტაციები გააყალბონ, მათ შორის, საერთაშორისო სასამართლოებისთვის, სადაც ცხადია, ამ პროცესებს რუსული რეჟიმი წააგებს.

მნიშვნელოვანია მისი გადაყვანა რეანიმაციაში. თუ ამას ხელისუფლება და ბიძინა ივანიშვილი არ აკეთებს, უნდა იცოდნენ, რომ „ნაციონალური მოძრაობისთვის“ ნომერ პირველი თემა იქნება სააკაშვილის ჯანმრთელობა, სიცოცხლე, ამ ჯოჯოხეთისგან გათავისუფლება.

ამ პირობებში სხვა პოლიტიკის წარმოება შეუძლებელი იქნება. როდესაც პოლარიზაციაზეა საუბარი და რაიმეს დასრულებაზე, ეს ბუნებაში ვერ მოხდება, სანამ პრეზიდენტი ამ მდგომარეობაშია. ჭიდაობენ და დანის პირზე გადიან, პაციენტი რეანიმაციაში არ გადაჰყავთ.

მინდა ვუთხრა ხელისუფლებას და ბიძინა ივანიშვილს: გამორიცხულია, სხვა თემა არ იარსებებს. როგორც „ნაციონალური მოძრაობის“ არჩეული თავმჯდომარე ყველაფერს გავაკეთებ, რომ დავმობილიზდეთ და სერიოზული მოძრაობა დავიწყოთ ამ მიმართულებით.

უნდა გაიხსნას პრეზიდენტის შტაბები რაიონებში, დახურული ინფრასტრუქტურა უნდა ამოძრავდეს. ივანიშვილმა უნდა იცოდეს, რომ დიახ, ფიზიკური პრობლემები შეექმნება“,- აღნიშნავს ხაბეიშვილი.