საქართველოს მესამე პრეზიდენტის, მიხეილ სააკაშვილის დედის, გიული ალასანიას ინფორმაციით, სააკაშვილს სურს, რომ დღევანდელ სასამართლო პროცესს დაესწროს.

ამის შესახებ მან მიხეილ სააკაშვილის მონახულების შემდეგ ჟურნალისტებს განუცხადა.

"განწყობილია, რომ ჩაერთოს. უნდა და აპირებს. თუ მისცა ჯანმრთელობის მდგომარეობამ შესაძლებლობა, ჩაერთვება", - აღნიშნავს ალასანია.

ამასთან, როგორც ალასანია ჟურნალისტებთან განმარტავს, სააკაშვილი რეანიმაციულ განყოფილებაში არ გადაუყვანიათ.

"ისევ პალატაშია, რეანიმაციაში არ გადაუყვანიათ. ყოველ წუთს ხუჭავდა თვალებს, შემდეგ ისევ ახელდა. ადამიანს შავი ფერი აქვს, ჩავარდნილი აქვს ყველაფერი. ორგანიზმში ისევ აქვს საწამლავი. ნევროლოგიური მდგომარეობა იგივეა. ადამიანი, უბრალოდ ვერ იღებს საკვებს", - აღნიშნა ალასანიამ.

თბილისის საქალაქო სასამართლოში მესამე პრეზიდენტის, მიხეილ სააკაშვილისთვის სასჯელის გადავადების, ან სასჯელისგან გათავისუფლებასთან დაკავშირებით სასამართლო პროცესი დღეს გაიმართება.

სხდომა თბილისის საქალაქო სასამართლოში 12:30 საათზეა ჩანიშნული.

მიხეილ სააკაშვილის ადვოკატის, შალვა ხაჭაპურიძის განცხადებით, დღევანდელ სასამართლო პროცესზე დაცვის მხარე, სავარაუდოდ, მოწმეების დაკითხვას დაასრულებს.