ეროვნული ბანკის პრეზიდენტის თანამდებობაზე მეორე ვადით მუშაობის გაგრძელებას შემოთავაზების შემთხვევაშიც, არ ვფიქრობ - ხინჯად დამრჩება გულში, რომ ჩემი მუშაობის პერიოდში საქართველომ ვერ მოახერხა საინვესტიციო რეიტინგის მიღწევა, - ამის შესახებ ეროვნულო ბანკის პრეზიდენტმა კობა გვენეტაძემ ჟურნალისტებთან განაცხადა.

კობა გვენეტაძემ ეროვნული ბანკის მომავალ პრეზიდენტს წარმატებები უსურვა.

„2 მარტს მეწურება ეროვნული ბანკის პრეზიდენტობის 7-წლიანი ვადა. დღევანდელ მონეტარული პოლიტიკის სხდომაზე ბოლოჯერ ვმონაწილეობდი პრეზიდენტის რანგში. ეს ჩემთვის არის 55-ე მონეტარული პოლიტიკის კომიტეტის სხდომა და ამ პერიოდის განმავლობაში 12-ჯერ მოხდა მონეტარული პოლიტიკის გამკაცრება, 10-ჯერ მოხდა მონეტარული პოლიტიკის შემცირება, 34-ჯერ შენარჩუნებული იქნა საპროცენტო განაკვეთი.

ყველას, ვისაც გაინტერესებდათ და აშუქებდით ამ საკითხებს მინდა მადლობა გადაგიხადოთ ინტერესისათვის. რა თქმა უნდა, ეს არის ძალიან დიდი პატივი, პრივილეგია, რომ ვიყო ეროვნული ბანკის პრეზიდენტი და მე მხვდა წილად ასეთი მაღალპროფესიონალური ორგანიზაციის ხელმძღვანელობა და მეც ყოველთვის ვცდილობდი, რომ კიდევ უფრო გამეზარდა პროფესიონალიზმი ამ ორგანიზაციის, მაგრამ ვფიქრობ, რომ 7 წელი საკმაოდ ბევრი გამოწვევებით იყო სავსე, ძალიან საინტერესო იყო, მაგრამ ვფიქრობ, რომ ჩემთვის ახლა უფრო საინტერესო სხვა მიმართულებით და სხვა პოზიციაზე მუშაობის გაგრძელება იქნება. ასე რომ, მეორე ვადით მუშაობის გაგრძელებას შემოთავაზების შემთხვევაშიც არ ვფიქრობ. იმ ადამიანს ვინც იქნება ეროვნული ბანკის პრეზიდენტი პირველ რიგში წარმატებებს ვუსურვებ და ვუსურვებ, რომ იმაზე მეტს მიაღწიოს, ვიდრე ჩემი პრეზიდენტობის დროს შევძელით.

სადაც არ უნდა ვიყო ყოველთვის გულშემატკივარი ვიქნები ამ ორგანიზაციის. ძალიან ხინჯად დამრჩება გულში, რომ ჩემი მუშაობის პერიოდის განმავლობაში საქართველომ ვერ მოახერხა საინვესტიციო რეიტინგის მიღწევა, რადგან რომ არა პანდემია და ომი ძალიან დიდი ალბათობით საქართველოს საინვესტიციო რეიტინგი ექნებოდა და მეც ძალიან ბედნიერი ვიქნებოდი ამით. დარწმუნებული ვარ, რომ საქართველო მივა იქამდე და საინვესტიციო რეიტინგი აუცილებლად ექნება. უნდა გაგრძელდეს დედოლარიზაციის ღონისძიებები, რადგან დოლარიზაცია დღეს არის საქართველოს ფინანსური სისტემის ყველაზე დიდი პრობლემა. ასევე, მინდა ვუსურვო ჩემს შემცვლელს, რომ არ მოადუნოს ყურადღება და მუდმივად გააგრძელოს დედოლარიზაციის ღონისძიებები", - განაცხადა კობა გვენეტაძემ.