უკრაინაში კრემლის ომის დასრულების შესაძლო შეთანხმების ფარგლებში რუსეთმა საქართველოს ტერიტორიაც უნდა დატოვოს. შესაბამისი განცხადება საქართველოს პრეზიდენტმა სალომე ზურაბიშვილმა გამოცემა Bloomberg-თან ინტერვიუში გააკეთა.

“რუსეთმა უნდა ისწავლოს სად არის მისი საზღვრები. საქართველოს პრობლემები მაგიდაზე უნდა იყოს, რადგან არავინ იფიქროს, თითქოს ეს ომი რუსეთის მიერ ყველა ოკუპირებული ტერიტორიის დატოვების გარეშე შესაძლოა გადაწყდეს”, - თქვა ზურაბიშვილმა.

პრეზიდენტის თქმით, რეგიონული წესრიგის აღდგენა უკრაინაში რუსეთის პრეზიდენტის ვლადიმირ პუტინის საბოლოო დამარცხებაზე არის დამოკიდებული და ეს მომენტი, მისი აზრით, ძალიან სწრაფად ახლოვდება.

“რუსეთმა პრაქტიკულად უკვე წააგო ბრძოლები, თუ არა მთელი ომი”, - აღნიშნავს ზურაბიშვილი.

ზურაბიშვილი აცხადებს, რომ დანებების პირობების ფარგლებში რუსეთს სრული გასვლა თუ არ მოეთხოვება, “დასავლური სამყარო კიდევ ერთ დიდ შეცდომას დაუშვებს - ისევე დიდს, როგორც 2008-ში, 2014-ში”.

ამასთან, მან ისაუბრა საქართველოს ევროინტეგრაციის კუთხითაც, პრეზიდენტის თქმით, საქართველოს ევროკავშირის ფორმალური კანდიდატობის სტატუსის არმიღების კიდევ ერთი საშუალება არ გააჩნია.

მისი აზრით, ეს წაახალისებს რუსეთს, რომ საქართველო “რუხ ზონად” წარმოიდგინოს მისი ამბიციებისთვის.

“კანდიდატის სტატუსი უნდა მოგვცეთ. უნაკლოები არ ვართ, ვიცი, რომ არის რაღაცები, რასაც არ ვაკეთებდით, მაგრამ ვფიქრობ, რომ ამ ყველაფრის მიუხედავად წინ უნდა მივდიოდეთ”, - თქვა ზურაბიშვილმა.

მიხეილ სააკაშვილთან დაკავშირებით ზურაბიშვილმა აღნიშნა, რომ საკუთარ გეგმებზე კომენტარის გაკეთებას არ აპირებს და განაცხადა, რომ იგი არ თვლის, რომ “ინდივიდუალური შემთხვევა ჩვენს ევროპულ მომავალს განსაზღვრავს”.