“ნაციონალური მოძრაობის” თავმჯდომარის, ლევან ხაბეიშვილის განცხადებით, ევროკავშირის ელჩთან შეხვედრისას ისაუბრეს მიხეილ სააკაშვილის ჯანმრთელობის მდგომარეობაზე და იმაზე, რომ “ნაციონალური მოძრაობა” სააკაშვილის სიცოცხლის შენარჩუნების პარალელურად ყველა გამოწვევისთვის მზადაა.

ამასთან, როგორც ხაბეიშვილმა პარტიის ოფისში ევროკავშირის ელჩთან, პაველ ჰერჩინსკთან შეხვედრის შემდეგ ჟურნალისტებს განუცხადა,“ნაციონალური მოძრაობა” პარტნიორებთან მუშაობას და პარტიის გაძლიერებას გააგრძელებს.

“ვისაუბრეთ პრეზიდენტ სააკაშვილის ჯანმრთელობაზე, სიცოცხლეზე, მის გადარჩენაზე. ვისაუბრეთ იმაზეც, რომ ჩვენი ქვეყნის ევროპული მომავალი მიბმულია პრეზიდენტ სააკაშვილის ჯანმრთელობაზე. ყველა კარგად აცნობიერებს, რომ პრეზიდენტის მკვლელებს ევროპაში არავინ ელოდება და ამ პერსპექტივამ შესაძლოა, ათწლეულებით გადაიწიოს, თუ პრეზიდენტ სააკაშვილის მდგომარეობა ფატალურად დამთავრდა.

ასევე, ვისაუბრეთ ნიკა გვარამიას პოლიტპატიმრობაზე. ჩვენი ქვეყნის ევროპულ პერსპექტივაზე, 12-პუნქტიან გეგმაზე და პრობლემებზე, რომელსაც ამ პუნქტების შესრულებისას ვაწყდებით. “ქართული ოცნება” ცდილობს, ეს ყველაფერი არ შეასრულოს და მეტიც, საქართველო არ გახდეს ევროკავშირის წევრი. ამისთვის “რუსული ოცნება” ყველაფერს აკეთებს.

ცხადია, გვქონდა საუბარი გამოსავლის გზებზე და იმაზე, რომ “ნაციონალური მოძრაობა” მზად იქნება, ყველა გამოწვევისთვის პრეზიდენტ სააკაშვილის სიცოცხლის შენარჩუნების პარალელურად. სხვა შემთხვევაში, როდესაც მესამე პრეზიდენტს, პუტინთან მებრძოლ მთავარსარდალს კლავენ პუტინს დავალებითვე, რაიმე სახის პოლიტიკურ პროცესებში ჩართვა უბრალოდ შეუძლებელია. ცხადია, თემები, რომელიც ჩვენი ქვეყნის ევროპულ მომავალს უკავშირდება და რომელიც პირდაპირ კავშირშია პრეზიდენტ სააკაშვილის ჯანმრთელობასთან, მთავარი საკითხი იყო რაზეც ვისაუბრეთ.

ნიკა გვარამიას საკითხსაც შევეხეთ. ის უპრეცედენტო განაჩენითაა დაკავებული. არ არსებობს მეორე ადამიანი, რომელიც ამავე ბრალდებით იყოს ტყვეობაში.

ამასთან, გავაგრძელებთ პარტნიორებთან მუშაობას. “ნაციონალური მოძრაობა” გავაგრძელებთ პარტიის გაძლიერებას, რაც გარდაუვალია. ბიძინა ივანიშვილმა და მისმა კრიმინალურმა ხელისუფლებამ უნდა იცოდეს, რომ როგორც ქვეყნის გარედან ექნება წნეხი, აუცილებლად ექნება ქვეყნის შიგნითაც მაშინვე, როდესაც მოვახერხებთ მობილიზებას, გააქტიურებას, ლოჯისტიკის აწყობას და ეს, რა თქმა უნდა, მალე იქნება”, - განაცხადა ლევან ხაბეიშვილმა.