სერგეი ლავროვის განცხადებამ გაამყარა “ქართული ოცნების“ პროპაგანდა იმის შესახებ, რომ ყველას, ვინც დასავლეთის მომხრეა, ვინც უკრაინის მომხრეა და საერთაშორისო სანქციებს შეუერთდა, საქართველოს ომში ჩართვა სურს, - ამის შესახებ ფრაქცია “ნაციონალური მოძრაობის“ დეპუტატმა ხატია დეკანოიძემ განაცხადა.

ოპოზიციონერი დეპუტატის თქმით, საქართველოს ეკონომიკა რუსეთის ეკონომიკას გადაეჯაჭვა და ამ მხრივ არსებული მაჩვენებლები კატასტროფულია. როგორც დეკანოიძემ აღნიშნა, ოკუპანტი ქვეყნის ეკონომიკაზე დამოკიდებულების ზრდა საქართველოს ეროვნულ ინტერესებთან მოდის წინააღმდეგობაში.

"ეს ყველაფერი ჯერ კიდევ მაშინ დაიწყო, როდესაც ბიძინა ივანიშვილის დოქტრინა იყო, რომ საქართველო დასავლეთსა და რუსეთს შორის განხეთქილების მიზეზი არ უნდა ყოფილიყო. “ქართული ოცნება“ და ბიძინა ივანიშვილი საკუთარი ძალაუფლების შესანარჩუნებლად დღემდე ცდილობს ყველაფერი დასავლური, რაც მის ძალაუფლებას შეარყევს, უარყოს და რუსულ მეთოდებზე გადავიდეს.

ტყუის ლავროვიც და “ქართული ოცნების“ პროპაგანდაც - სწორედ ევროკავშირისა და ნატოს წევრი ქვეყნები არიან ყველაზე დაცული და უსაფრთხო ქვეყნები, ეკონომიკურად ყველაზე განვითარებული სახელმწიფოები და ამიტომ ჩვენი ამოცანაა, რომ საქართველოს მოქალაქეებთან ამ მიმართულებით ვიმუშაოთ“, - განაცხადა ხატია დეკანოიძემ.

რუსეთის საგარეო საქმეთა მინისტრის სერგეი ლავროვის განცხადებით, საქართველოს ხელისუფლება დასავლეთის უპრეცედენტო ზეწოლის საპასუხოდ, რომელიც რუსეთის წინააღმდეგ სანქციების დაწესებას ითხოვს, ეროვნული ინტერესებით ხელმძღვანელობს.

“ახლა საქართველოში პრეზიდენტთან ერთად არის ხელისუფლება, რომელიც დასავლეთის უპრეცედენტო წნეხისა და სანქციებთან შეერთების, მეორე ფრონტის გახსნის მოთხოვნის საპასუხოდ ამბობს: “თქვენ იცით, რომ ჩვენ ეროვნული ინტერესებით ვხელმძღვანელობთ. ჩვენ გვაქვს ვაჭრობა რუსეთთან, ტურიზმის და ენერგომატარებლებს ჩვენ ვიღებთ“, - განაცხადა ლავროვმა.

მისივე თქმით, ხელისუფლების ეს პოზიცია საქართველოს სახელმწიფოს და ქართველი ხალხის ინტერესებს პასუხობს.

“იმაში, რომ სურთ საქართველო გადააქციონ მორიგ “გამღიზიანებლად“ , დააბრუნონ ვითარება სააკაშვილისეულ აგრესიულ დროში, მე ეჭვიც არ მეპარება“, - განაცხადა ლავროვმა.