ეს კონკრეტული ევროპარლამენტარები არიან სალომე სამადაშვილები და ლევან ხაბეიშვილები, არც მეტი, არც ნაკლები, - ასე პასუხობს პარტია "ქართული ოცნების" თავმჯდომარე ირაკლი კობახიძე გუშინ ევროპარლამენტში გამართულ დებატებზე გაკეთებულ განცხადებებთან დაკავშირებით დასმულ კითხვას.

კობახიძის თქმით, კანდიდატის სტატუსის მიღების კონტექსტში მათ პოზიციას არანაირი მნიშვნელობა და დატვირთვა არ აქვს.

„მნიშვნელობა და დატვირთვა აქვს ევროკომისიის შეფასებებს, გადაწყვეტილებებს და ევროპული საბჭოს გადაწყვეტილებებს. რაც შეეხება ევროპულ კომისიას, მან თავადვე აღიარა, რომ შარშან ობიექტურ კრიტერიუმებზე დაყრდნობით რომ ყოფილიყო გადაწყვეტილება მიღებული, ეს გადაწყვეტილება კანდიდატის სტატუსთან დაკავშირებით ჩვენთან მიმართებით იქნებოდა დადებითი, ეს წერია პრაქტიკულად დღევანდელ დოკუმენტში. აქედან გამომდინარე თამამად შეგვიძლია ვთქვათ, თუ იქნება დეკემბერში ობიექტურ კრიტერიუმებზე დაყრდნობით გადაწყვეტილება მიღებული, ეს იქნება აუცილებლად დადებითი საქართველოსთვის, რადგან ეს უკვე შეფასებული აქვს ევროპულ კომისიას”, - განაცხადა კობახიძემ.