მიხეილ სააკაშვილის თემას, ფაქტობრივად, წაღებული აქვს საზოგადოებრივი ყურადღება. ამ საკითხმა ჩაკლა პოლიტიკა, რაც არის ხელისუფლების ინტერესი და ის ამით სარგებლობს, - ამის შესახებ პარტია „ხალხისთვის“ ლიდერმა ანა დოლიძემ „პალიტრანიუსის“ გადაცემა „ნიუსრუმში“ განაცხადა.

როგორც დოლიძემ აღნიშნა, „ქართულ ოცნებას“ სჭირდება, რომ საზოგადოება „ჩაითრიოს ამ დიაგნოზების განხილვაში, ყვითელ შოუს გვიდგამს და ხალხს ამაზე ალაპარაკებს“.

„ხელისუფლება არამარტო ქართულ პოლიტიკურ სპექტრზე, არამედ ევროკავშირზეც გვეუბნება, რომ ისინი „განაცდნენ“. ევროკავშირში ვინც ხმას ამოიღებს, მათზეც ამბობენ, რომ „განაცდნენ“. სინამდვილეში, ეს არის საინფორმაციო ომი, რადგან მოსახლეობის უმრავლესობა ვერ იგებს სად არის სიმართლე. სააკაშვილი მოიწამლა თუ არა, კონკრეტულად რა დიაგნოზი აქვს, ეს ამბავი საინფორმაციო ომში არის მოყოლილი - აქედან ერთს ამბობენ, ხოლო მეორე მხრიდან მეორეს.

ჩემი და ჩემი მომხრეების ხაზი არის, რომ სააკაშვილის თემა უნდა გადაწყდეს. ეს არის ჩვენი მოსახლეობის ინტერესში. ეს თემა უნდა გადაწყდეს ან ისე ან ასე. სააკაშვილი, როგორც პატიმარი, რა თქმა უნდა, უნდა იყოს ჯანმრთელი. მთელი ცხოვრებაა ციხეში დავდივარ - ხან ლურსმანდაჭედილ პატიმარს ვნახულობ, ხან პირამოკერილს. ჩვეულებრივ პატიმარს ვექომაგებოდი და როგორც ყველა პატიმარი, მიხეილ სააკაშვილი უნდა იყოს ჯანმრთელად და ეს თემა უნდა გადაწყდეს, რათა ჩვენ გავაგრძელოთ პოლიტიკური ცხოვრება. საქართველოში ვინც დარჩა, სამ მილიონზე მეტი ადამიანი, მათ ბედს მივხედოთ“, - განაცხადა ანა დოლიძემ.