პრემიერ-მინისტრის, ირაკლი ღარიბაშვილის განცხადებით, მთავრობა ქვეყნის ათ ქალაქსა და მის რეგიონში ურბანული განახლების პროექტის დაწყებას გეგმავს, რაც მსხვილი ქალაქების სრულ რეაბილიტაციას გულისხმობს.

როგორც ღარიბაშვილმა მთავრობის სხდომაზე აღნიშნა, მთავრობა მსხვილი პროექტების განხორციელებას სახელმწიფოს თანამონაწილეობით გეგმავს.

„ამ პროექტებში უნდა ვიყოთ წამყვანი, იმიტომ, რომ ეს არის საერთო ეროვნული, სახელმწიფო მნიშვნელობის მსხვილი პროექტები. ასევე, ჩვენ გვაქვს ძალიან კარგი ინიციატივა, გვინდა წელსვე დავიწყოთ ათ ქალაქსა და მათ რეგიონში მსხვილი ურბანული განახლების პროექტი, რაც გულისხმობს მსხვილი ქალაქების სრულ რეაბილიტაციას. ჩვენ შევარჩიეთ ტურისტებისთვის ყველაზე მეტად პოპულარული ადგილები, როგორიცაა: ბორჯომი, ბაკურიანი, წყალტუბო, მესტია, ყაზბეგი, ქუთაისი, ბათუმი და ა.შ. ამ ყველაფრის შესახებ დეტალურ პროგრამას ძალიან მალე წარმოგიდგენთ. ამის თაობაზე ირაკლი ქარსელაძის სამინისტრო აქტიურად მუშაობს და გეგმას რამდენიმე ხანში წარმოვადგენთ. ასე რომ ჩვენ ყველაფერს ვაკეთებთ, ქვეყანაში ეს დადებითი დინამიკა შენარჩუნდეს, ეს ტემპები, ყველა მიმდინარე პროექტი კიდევ უფრო უნდა დავაჩქაროთ. რა თქმა უნდა, ჩვენი მოლოდინი არის, რომ წელსაც უნდა გვქონდეს ძალიან წარმატებული წელი“, - განაცხადა ღარიბაშვილმა.