პარლამენტის თავმჯდომარის, შალვა პაპუაშვილის განცხადებით, ომბუდსმენის არჩევის პროცესში არასამთავრობო სექტორმა ნეგატიური როლი შეასრულა და ოპოზიცია საკუთარ არჩევანში ჩაკეტა.

პაპუაშვილის შეფასებით, ოპოზიციას ძალიან გაუჭირდა არასამთავრობო სექტორის მიერ დაწესებული ჩარჩოებიდან გასვლა.

„რაც შეეხება ომბუდსმენის არჩევის საკითხებს, ჩვენ ვნახეთ, რომ, სამწუხაროდ, არასამთავრობო სექტორმა შეასრულა ძალიან ნეგატიური როლი. მათ, ფაქტობრივად, ჩაკეტეს ოპოზიცია თავის არჩევანში, დაასახელეს რამდენიმე კანდიდატი და მე პირადად ვხედავდი, რამდენად უჭირდათ ოპოზიციაში, რომ გასულიყვნენ ამ ჩარჩოებიდან, რომელიც მათ დაუწესა რამდენიმე არასამთავრობო ორგანიზაციამ. მე ამაზე ღიად მქონდა საუბარი, რომ სამწუხარო იყო ის როლი, რაც ითამაშა არასამთავრობო სექტორმა ამ მხრივ. იმედი მაქვს, რომ ამ შემთხვევაში პოლიტიკური პარტიები საკუთარი პასუხისმგებლობიდან ამოვლენ, ამ პასუხისმგებლობის გრძნობით მიუდგებიან სახალხო დამცველის არჩევის საკითხს და მივაღწევთ შეთანხმებას და იმ უმრავლესობას, რომელიც საჭიროა სახალხო დამცველის ასარჩევად“,- განაცხადა პაპუაშვილმა.