პარლამენტის თავმჯდომარე შალვა პაპუაშვილი იმედოვნებს, რომ ევროკავშირი საქართველოსთან მიმართებით მიიღებს გადაწყვეტილებას, რომელიც ეხება ევროკავშირის წევრობისთვის კანდიდატი ქვეყნის სტატუსის მიღებას. ამის შეახებ პაპუაშვილმა ჟურნალისტებს პარლამენტში განუცხადა, როდესაც ამ საკითხთან დაკავშირებით პარლამენტის მხრიდან გაწეულ სამუშაოზე დასმულ შეკითხვას უპასუხა.

„ჩვენ, ამ დღეებში, კითხვარიდან გამომდინარე ევროკომისიის შეფასება ვიხილეთ. მე მგონი, საზოგადოება დარწმუნდა იმაში, რომ საქართველო ჯერ კიდევ ივნისში იმსახურებდა კანდიდატის სტატუსს. სხვათა შორის, ჩვენ ეს შეფასებები შევადარეთ ასევე სხვა კანდიდატ ქვეყნებს. მაგალითად, ბოსნია და ჰერცეგოვინას, რომელმაც კანდიდატის სტატუსი დეკემბერში მიიღო, საგრძნობლად ვუსწრებთ ჩვენი მონაცემებით. ამიტომ, საქართველო ივნისშივე იმსახურებდა კანდიდატობას.

შარშან, 24 ივნისიდან მოყოლებული ყოველი დღე, როდესაც საქართველოს არ აქვს კანდიდატის სტატუსი, საქართველოს მიმართ უსამართლობაა. ამიტომ, იმედი გვაქვს, რომ მიმდინარე წელს ევროკავშირი ამ მხრივ იმ გადაწყვეტილებას მიიღებს, რომელიც კანდიდატის მიღებას შეეხება“- აცხადებს პაპუაშვილი.

შეგახსენებთ, ევროკომისიამ საქართველოს ევროკავშირში გაწევრიანების განაცხადის შესახებ ანგარიში გამოაქვეყნა. როგორც ანგარიშშია ნათქვამი, საქართველოს აქვს მომზადების გარკვეული დონე მართლმსაჯულების, თავისუფლებისა და უსაფრთხოების სფეროში კანონმდებლობის განსახორციელებლად. ასევე, დოკუმენტში აღნიშნულია, რომ საქართველოს აქვს გარკვეული დონის მომზადება სახელმწიფო შესყიდვების სფეროში. დოკუმენტში საუბარია ციფრულ ტრანსფორმაციასა და მედიაზეც და ხაზგასმულია, რომ ევროკავშირი მხარს უჭერს ელექტრონული ბაზრის გამართულ ფუნქციონირებას, კომუნიკაციებს, ელექტრონულ კომერციასა და აუდიო-ვიზუალურ მომსახურებას.