მართლმსაჯულებამ არაერთხელ დაამტკიცა, რომ ის არის დამოუკიდებელი და პროფესიული, შესაბამისად, მე დარწმუნებული ვარ, რომ სასამართლო მიიღებს ობიექტურ გადაწყვეტილებას, - ამის შესახებ საქართველოს პარლამენტის თავმჯდომარემ შალვა პაპუაშვილმა ქვეყნის ყოფილი პრეზიდენტის მიხეილ სააკაშვილის სასამართლო პროცესთან დაკავშირებით განაცხადა, რომელზეც მოსამართლემ სააკაშვილისთვის სასჯელის გადავადების საკითხზე გადაწყვეტილება შესაძლოა, დღეს გამოაცხადოს.

პაპუაშვილის განმარტებით, სასამართლო პროცესი საკუთარ თავში გულისხმობს იმას, რომ გადაწყვეტილებას მიიღებს მოსამართლე და არა პოლიტიკოსები.

„სასამართლო პროცესი იმას გულისხმობს, რომ მოსამართლე იღებს გადაწყვეტილებას და ამაზე გადაწყვეტილებას არ იღებენ პოლიტიკოსები და არც ადვოკატები, მათ შორის. მოსამართლემ მოისმინა პოზიციები, მოისმინა ექსპერტების ჩვენებები და ამის საფუძველზე მიიღებს გადაწყვეტილებას. საქართველო გახლავთ სამართლებრივი სახელმწიფო, საქართველოს, მართლმსაჯულებამ არაერთხელ დაამტკიცა, რომ ის არის დამოუკიდებელი და პროფესიული ამ მხრივ. შესაბამისად, მე დარწმუნებული ვარ, რომ სასამართლო მიიღებს ობიექტურ გადაწყვეტილებას“,- განაცხადა შალვა პაპუაშვილმა.

ცნობისთვის, საქართველოს ყოფილი პრეზიდენტისთვის, მიხეილ სააკაშვილისთვის სასჯელის გადავადებასთან, ან სასჯელისგან გათავისუფლებასთან დაკავშირებით, სასამართლომ გადაწყვეტილება შესაძლოა, დღეს გამოაცხადოს.