მოსამართლე გადაწყვეტილების მოსაფიქრებლად არც კი გასულა, ყველაფერი წინასწარ ჰქონდა გაწერილი, - ამის შესახებ "კანონი და სამართლის" ლიდერმა თაკო ჩარკვიანმა განაცხადა.

როგორც მან მიხეილ სააკაშვილის სასჯელის გადავადებასთან ან გაუქმებასთან დაკავშირებულ სასამართლო პროცესზე მოსამართლე გიორგი არევაძის გადაწყვეტილების შესაფებისას აღნიშნა, "როცა ვიღაცას ყურებით ჰყავხარ დათრეული, დიდი შიში გაქვს", ამიტომ მოსამართლის გადაწყვეტილება მოულოდნელი არ იყო.

მისივე თქმით, საქართველოში, ბიძინა ივანიშვილის სახით, "ჯოჯოხეთია".

"ჩვენ ვამბობთ, რომ ქვეყანაში ავტორიტარიზმია. თუ ვამბობთ, რომ ასეა, მაშინ რეჟიმთან ბრძოლა უფრო მწვავე უნდა იყოს. აუცილებელია აქციები და უცხოელებთან მუშაობა, რასაც მუდმივად ვაკეთებთ.

მოსამართლე გიორგი არევაძის გადაწყვეტილება მოულოდნელი არ იყო. მე ვიცი, რომ საქართველოში, ბიძინა ივანიშვილის სახით, ჯოჯოხეთია. მიუხედავად ამისა, ვიფიქრე, იქნებ მოსამართლე არევაძე საკუთარ ოჯახს გაუფრთხილდეს - მეთქი. როგორც ჩანს, როცა ვინმეს ყურებით ჰყავხარ დათრეული, უფრო დიდი შიში გაქვს. მოსამართლე გადაწყვეტილების მოსაფიქრებლად არც კი გასულა. რატომ? იმიტომ, რომ ყველაფერი წინასწარ გაწერილი ჰქონდა", - განაცხადა თაკო ჩარკვიანმა.

ცნობისთვის, თბილისის საქალაქო სასამართლომ საქართველოს ყოფილი პრეზიდენტი მიხეილ სააკაშვილი სასჯელისგან არ გაათავისუფლა და არც გადაუვადა.

აღნიშნული გადაწყვეტილება მოსამართლე გიორგი არევაძემ გამოაცხადა. ამ გადაწყვეტილებით, არევაძემ სააკაშვილის ადვოკატების შუამდგომლობა არ დააკმაყოფილა.