სპეციალური საგამოძიებო სამსახური - მსხვერპლებს სისხლის სამართლის საქმის მასალების გაცნობის უფლება 59 საქმეზე მიეცათ
მსხვერპლის ჩართულობა გამოძიების პროცესში და გამოძიების მიმდინარეობის შესახებ მისთვის სრულფასოვანი ინფორმაციის მიწოდება, ეფექტური, ობიექტური და მიუკერძოებელი გამოძიების წარმოების მნიშვნელოვანი კომპონენტია, - ამის შესახებ სპეციალური საგამოძიებო სამსახურის უფროსის მოადგილე ნათია სონღულაშვილმა „ინტერპრესნიუსთან“ ინტერვიუში განაცხადა.
მისი განმარტებით, სამსახურის თითქმის 1-წლიანი მუშაობის განმავლობაში, მსხვერპლებს სისხლის სამართლის საქმის მასალების გაცნობის უფლება 59 საქმეზე მიეცათ.
„2022 წელს სპეციალურმა საგამოძიებო სამსახურმა მიიღო ქართული საგამოძიებო სივრცისთვის უპრეცედენტო გადაწყვეტილება, ევროპული სასამართლოს რეკომენდაციებზე დაყრდნობითა და უფლებადამცველი ორგანიზაციების მონაწილეობით საგამოძიებო პროცესში მსხვერპლთა ჩართულობის კუთხით. უფრო კონკრეტულად კი შეიქმნა და ამოქმედდა სახელმძღვანელო, რის საფუძველზეც საგამოძიებო უწყება გამოძიების გამჭირვალობისა და მსხვერპლის ინფორმირებულობის უზრუნველსაყოფად, მას სისხლის სამართლის საქმესთან წვდომისა და საქმის მასალების გაცნობის შესაძლებლობას აძლევს, რაც პრაქტიკაში წარმატებით ხორციელდება.
იმისათვის რომ მსხვერპლმა ისარგებლოს აღნიშნული უმნიშვნელოვანესი შესაძლებლობით საჭიროა მხოლოდ არსებობდეს მოცემულობა - სპეციალური საგამოძიებო სამსახური უნდა იძიებდეს საქმეს სამართალდამცავის მხრიდან ამ კონკრეტული მსხვერპლის მიმართ არასათანადო მოპყრობის, წამების ან/და ძალადობრივი სამოხელეო დანაშაულის ჩადენის ფაქტზე. საქმის მასალებთან წვდომის სახელმძღვანელო პრინციპების ამოქმედებიდან დღემდე ამ უფლებით 59 საქმეზე ისარგებლეს მსხვერპლებმა,“ - განაცხადა სპეციალური საგამოძიებო სამსახურის უფროსის მოადგილემ ნათია სონღულაშვილმა.
ინტერვიუს სრული ვერსია იხილეთ ბმულზე.
