გიორგი ბოტკოველი - დღეს „ქართულ ოცნებასთან“ რაიმე კოორდინაციაში ყოფნა, მათთან მუშაობა წარმოუდგენლად მიმაჩნია, მათ შორის, საკრებულოების დონეზე
დღეს „ქართულ ოცნებასთან“ რაიმე კოორდინაციაში ყოფნა, მათთან მუშაობა წარმოუდგენლად მიმაჩნია, მათ შორის, საკრებულოების დონეზე, - ამის შესახებ „ნაციონალური მოძრაობის“ წევრმა, გიორგი ბოტკოველმა განაცხადა, რითაც უპასუხა კითხვას, მიზანშეწონილად მიაჩნია თუ არა, რომ მუშაობა საკრებულოს დეპუტატებმაც შეწყვიტონ.
მისივე თქმით, დღეს, „ნაციონალური მოძრაობის“ სამოქმედო გეგმასთან დაკავშირებით რაიონული ორგანიზაციის ხელმძღვანელებთან შეხვედრა გაიმართება.
როგორც ბოტკოველი აღნიშნავს, კონსულტაციები მუდმივ რეჟიმში მიმდინარეობს ასევე, თითქმის ყველა ოპოზიციურ პარტიასთან და საბოლოო გადაწყვეტილება მოგვიანებით გახდება ცნობილი.
"ჩვენ განაცხადი გავაკეთეთ იმასთან დაკავშირებით, რომ პროტესტის ყველა ფორმას გამოვიყენებთ. დღეს "ქართულ ოცნებასთან" რაიმე კოორდინაციაში ყოფნა, მათთან მუშაობა წარმოუდგენლად მიმაჩნია. ჩვენ ვნახეთ გუშინდელი გადაწყვეტილება, რომელიც ყველამ კარგად ვიცით, რომ ეს შეიძლება არ იყო მოსამართლის გადაწყვეტილება. ეს იყო თავიდან ბოლომდე პოლიტიკური გადაწყვეტილება, რომელიც გამოიტანა ბიძინა ივანიშვილმა და პროცედურულად გააფორმა არევაძემ," - განაცხადა ბოტკოველმა.
