პრეზიდენტის არგუმენტები მესმის, თუმცა, არ ვეთანხმები - სააკაშვილის საკითხის გადაწყვეტა მოიტანს დეპოლარიზაციასაც, - ამის შესახებ ჟურნალისტებთან "ლელოს" დეპუტატმა ანა ნაცვლიშვილმა განაცხადა, რითაც მიხეილ სააკაშვილის შეწყალების საკითხზე პრეზიდენტის განცხადებას გამოეხმაურა.

ნაცვლიშვილი მიიჩნევს, რომ პოლიტიკური და ჰუმანიტარული თვალსაზრისით ზურაბიშვილმა ეს ნაბიჯი უნდა გადადგას იმის მიუხედავად, რომ მიხეილ სააკაშვილის პატიმრობაში დასატოვებლად ბერკეტები მაინც რჩება.

"ის, რომ მთავარი პასუხისმგებელი არის "ქართული ოცნება", ეს ცხადია და კობახიძის განცხადებამაც დაადასტურა, რომ მიღებული გადაწყვეტილება "ქართული ოცნების" პოზიციაა და უბრალოდ გაახმოვანა მოსამართლემ, ამ ნაწილში პრეზიდენტის მოსაზრებას აქვს სრული საფუძველი. რაც შეეხება პრეზიდენტის პოზიციას, მესმის ის არგუმენტები რაზე დაყრდნობითაც ასე ხედავს საკითხს, თუმცა, არ ვეთანხმები და ვფიქრობ, რომ პოლიტიკური და ჰუმანიტარული თვალსაზრისით მან ეს ნაბიჯი უნდა გადადგას, იმის მიუხედავად, თუ როგორ მოიქცევა მერე "ქართული ოცნება" და გამოიყენებს თუ არა მის ხელთ არსებულ შესაძლებლობებს, რომ მიხეილ სააკაშვილი მაინც დატოვოს პატიმრობაში. ვფიქრობ, პრეზიდენტმა მისი წილი ნაბიჯი ამ პროცესში უნდა გადადგას. სააკაშვილის საკითხის გადაწყვეტა ჰუმანიტარულ ჭრილში მოიტანს დეპოლარიზაციასაც.

ქვეყნის რეპუტაციას, რა თქმა უნდა, განსაკუთრებით ლახავს ის, რომ ამდენი წელია სასამართლო რეფორმაზე გვესაუბრება ყველა ჩვენი პარტნიორი და წინ კი არ მიდის პროცესი, პირიქით, ფაქტობრივად, უარესდება,"- განაცხადა ნაცვლიშვილმა.

ცნობისათვის, პრეზიდენტ სალომე ზურაბიშვილის განცხადებით, ქვეყნის რეპუტაცია შეილახა, საქართველოს ადგილი ახალ გეოპოლიტიკურ მოცემულობაში გაურკვეველი გახდა, რაც მმართველი გუნდის და ოპოზიციის ერთობლივი ძალისხმევის შედეგია. რაც შეეხება მიხეილ სააკაშვილთან დაკავშირებით სასამართლოს მიერ მიღებულ გადაწყვეტილებას, ზურაბიშვილი მიიჩნევს, რომ ამით "ქართველ ხალხს ჩაკეტილ წრეზე ტრიალი მიესაჯა." მისივე თქმით, სააკაშვილი შეწყალებით ვერ გათავისუფლდება და ამ თვალსაზრისით, პრეზიდენტისკენ ხელის გაშვერა არაფრის მომტანია.