თანხმობა ჩვენი ბუნებრივი ინტერესია და ნუ ეძებთ მზაკვრულ მიზნებს იმის თაობაზე, რომ შეიძლება უმრავლესობა აღვივებდეს უთანხმოებას - რა თქმა უნდა, უთანხმოება გვექნება რადიკალიზმთან, ამიტომ დერადიკალიზაცია არის პირველადი ამოცანა, რათა თანხმობაზე ორიენტირებული პოლიტიკა გვქონდეს, - ასე მიმართა პარლამენტის თავმჯდომარე შალვა პაპუაშვილმა ოპოზიციონერ დეპუტატებს პარლამენტის პლენარულ სხდომაზე წლიური ანგარიშის წარდგენისას, როდესაც ოპოზიციასთან თანამშრომლობის რესურსის თაობაზე დასმულ კითხვას უპასუხა.

პაპუაშვილის თქმით, პარლამენტში სამუშაო ჯგუფების ფუნქციონირებისას გამოჩნდა, რომ რაციონალური მსჯელობისას თანამშრომლობა შესაძლებელია.

„ვფიქრობ, რომ მაგალითად, სამუშაო ჯგუფები იყო კარგი მოთელვა, ვარჯიში თანამშრომლობისთვის. ბევრ სამუშაო ჯგუფში გამოჩნდა, რომ როდესაც რაციონალური მსჯელობა და არგუმენტებით პოზიციების დაცვა ხდება, შესაძლებელია თანამშრომლობა, რაც გულისხმობს სამუშაო ჯგუფებში მონაწილეობას და რადიკალიზმის უარყოფას. ეს არის გზა თანამშრომლობისკენ. „ქართულ ოცნებას“ აქვს უმრავლესობა, რომ გადაწყვეტილებები მიიღოს, პარლამენტი იყოს ქმედუნარიანი, მაგრამ ეს არ არის პოზიცია, რომ უმრავლესობა გვაქვს და რა გადაწყვეტილებას გვინდა იმას მივიღებთ. როგორც ყველა ადამიანი, ასევე ყველ პოლიტიკური ძალა ელტვის ჰარმონიას და არა კონფრონტაცია. პირველ რიგში კი ხელისუფლებაა, ვისაც ჰარმონია უნდა“, - განაცხადა შალვა პაპუაშვილმა.

გარდა ამისა, პაპუაშვილმა ისაუბრა „ნაციონალური მოძრაობის“ წევრების პოლიტიკურ ბოიკოტზე და დეპუტატებს განუმარტა, რომ რეგლამენტის თანახმად, „ბოიკოტი უცხადდება მხოლოდ პლენარულ სხდომასა და მასზე განსახილველ საკითხებს და არა კომიტეტებს“.

„თავისთავად, ბოიკოტი ხანდახან მავნე პრაქტიკაა. მინდა მოგმართოთ დეპუტატებს, ვინც ბოიკოტის გამოცხადებას აპირებთ - ბოიკოტი უნდა გამოუცხადოთ მხოლოდ პლენარულ სხდომასა და მასზე განსახილველ საკითხებს და არა კომიტეტებს. განსახილველი საკითხები შედგენილია ერთი კვირით და ამიტომ, თუ ბოიკოტის გამოცხადების სურვილი იქნება, მოგმართავთ, რომ ფორმალობა დაიცვათ, რადგან ეს არ არის უბრალოდ არდასწრების სურვილი, არამედ ეს არის კონკრეტული პოზიცია, რაღაც საკითხების მიმართ“, - განაცხადა შალვა პაპუაშვილმა.